బధిర ఐటీఐలో కొంతకాలంగా సిబ్బంది ఇష్టారాజ్యంగా వ్యవహరిస్తున్నారని విద్యార్థులు తీవ్ర ఆవేదన వ్యక్తం చేస్తున్నారు. చదువుకోవడానికి వచ్చిన తమను సిబ్బంది ఇంటి పనులకు, వంట పనులకు వాడుకుంటున్నారని కన్నీటిపర్యంతం అవుతున్నారు. తెల్లవారుజామున 3 గంటలకే నిద్రలేపి చీపుర్లు చేతికిచ్చి ఊడ్పిస్తున్నారు. ఒకవేళ ఆ పనులు చేయడానికి నిరాకరిస్తే దారుణంగా బెదిరింపులకు పాల్పడుతూ భయాందోళనలకు గురిచేస్తున్నారు. మాటలు రాని, చెవులు వినిపించని తమ నిస్సహాయతను సిబ్బంది ఆసరాగా చేసుకుని నిత్యం వేధింపులకు గురిచేస్తున్నారని విద్యార్థులు సైగలతో తమ గోడును వెళ్లబోసుకుంటున్నారు.

రోజురోజుకూ పెరుగుతున్న ఈ వేధింపులకు వెంటనే అడ్డుకట్ట వేయాలని బధిర విద్యార్థులు టీటీడీ ఉన్నతాధికారులను వేడుకుంటున్నారు. చదువుకోవాల్సిన తమతో బలవంతంగా పనులు చేయిస్తూ, తమ భవిష్యత్తుతో ఆడుకుంటున్న నిర్లక్ష్యపు సిబ్బందిపై కఠిన చర్యలు తీసుకోవాలని డిమాండ్ చేస్తున్నారు. ఈ సున్నితమైన వ్యవహారంపై టీటీడీ జాయింట్ ఎగ్జిక్యూటివ్ ఆఫీసర్ (జేఈవో) నేరుగా జోక్యం చేసుకోవాలని కోరుతున్నారు. తమ సమస్యలను క్షేత్రస్థాయిలో పరిశీలించి, భవిష్యత్తులో ఇలాంటి వేధింపులు పునరావృతం కాకుండా తమకు న్యాయం చేయాలని దివ్యాంగ విద్యార్థులు రెండు చేతులూ జోడించి విజ్ఞప్తి చేస్తున్నారు.