బాలిక తన తల్లిదండ్రులు, ముగ్గురు సోదరీమణులతో కలిసి అంజర్‌లో నివసిస్తోంది. ఆ కుటుంబం మరో రాష్ట్రానికి చెందినదని, సుమారు ఆరు సంవత్సరాలుగా గుజరాత్‌లో ఉంటున్నట్లు సమాచారం. సెప్టెంబర్ 14న ఆగ్రాకు చెందిన ఓ బాలుడితో ఫోన్‌లో మాట్లాడుతుండగా తల్లి గమనించి ఆమెను ప్రశ్నించినట్లు ఫిర్యాదులో పేర్కొంది. అనంతరం తండ్రి ఇంటికి వచ్చినప్పుడు, బాలిక ఓ అబ్బాయితో మాట్లాడుతోందని, అతనితో సంబంధం ఉందని తల్లి చెప్పినట్లు తెలిపింది.

ఈ విషయం తెలుసుకున్న తండ్రి ఆగ్రహంతో తనపై దాడి చేసి ఇంట్లోనే బంధించాడని బాలిక ఆరోపించింది. తనకు ఆహారం, నీరు ఇవ్వకుండా కొన్ని గంటల పాటు శారీరకంగా వేధించారని పేర్కొంది. ఆ తర్వాతి రోజుల్లో ఇంట్లోనే పలుమార్లు తండ్రి లైంగిక దాడికి పాల్పడ్డాడని, ఆ సమయంలో తల్లి కూడా అక్కడే ఉందని ఫిర్యాదులో తెలిపింది. ఈ వేధింపులు సెప్టెంబర్ 20న, సెప్టెంబర్ 29న కూడా కొనసాగినట్లు బాలిక ఆరోపించింది.

సెప్టెంబర్ 29న బాలిక అదే నివాస సముదాయంలో ఉండే తన అత్త ఇంటికి వెళ్లి ఆమె ఫోన్‌ నుంచి 112 అత్యవసర సేవలకు సమాచారం ఇచ్చినట్లు పోలీసులు తెలిపారు. అయితే తల్లిదండ్రులు ఆ ఫోన్‌ను తీసుకుని ఆమెను తిరిగి ఇంటికి తీసుకెళ్లారని, అనంతరం మళ్లీ ఇంట్లోనే నిర్బంధించారని బాలిక ఆరోపించింది. అక్టోబర్ 1న కూడా తండ్రి తనపై లైంగిక దాడికి పాల్పడ్డాడని, ఆ సమయంలో తల్లి అక్కడే ఉందని తెలిపింది.

అక్టోబర్ 1న తండ్రి పనికి వెళ్లిన మరుసటి ఉదయం బాలిక మళ్లీ అత్త ఇంటికి చేరుకుని జరిగిన విషయాలను వివరించింది. అనంతరం మరోసారి పోలీసుల అత్యవసర నంబర్‌కు సమాచారం అందించింది. ఫిర్యాదు అందుకున్న పోలీసులు బాలిక తల్లిదండ్రులను అదుపులోకి తీసుకుని దర్యాప్తు ప్రారంభించారు. ప్రస్తుతం బాలికను అధికారులు తమ సంరక్షణలోకి తీసుకున్నారు. కేసులో నమోదైన ఆరోపణలపై పోలీసులు తదుపరి విచారణ కొనసాగిస్తున్నారు.