భారతదేశానికి స్వాతంత్య్రం రాక మునుపు జరిగే కథాంశంతో ఈ సినిమా ప్రారంభమవుతుంది. దేవుడంటే ఏమాత్రం విశ్వాసం లేని నాస్తికుడు, స్వాతంత్ర్య సమరయోధుడు అయిన డాక్టర్ రామ్ నందన్ భోంస్లే (చందన్ ఆనంద్) జీవితంలో చోటుచేసుకునే కొన్ని అనూహ్య సంఘటనలు ఆయన సిద్ధాంతాలను ఎలా మార్చేశాయనేది ఇందులో ఆసక్తికరం. ఇదే క్రమంలో అతనికి లక్ష్మీనారాయణ శర్మ (శోభినవ్ సత్య)తో పరిచయం ఏర్పడుతుంది. ఆ లక్ష్మీనారాయణ శర్మే కాలక్రమంలో ప్రపంచవ్యాప్తంగా కోట్లాది మంది భక్తులను సంపాదించుకున్న ‘నీమ్ కరోలీ బాబా’గా ఎలా మారారు? ఆయన సాగించిన ప్రయాణంలో ఎందరి జీవితాల్లో వెలుగులు నింపారు అనేది ఈ సినిమా కథ.

దర్శకుడు విశాల్ చతుర్వేది ఎలాంటి కమర్షియల్, రాజకీయ అజెండాలు లేకుండా కేవలం బాబా నిస్వార్థ కరుణ, ఆయన చేసిన అద్భుతాల చుట్టే కథను నడిపించిన తీరు ప్రశంసనీయం. బాబా పాత్రలో నటుడు శోభినవ్ సత్య ఒదిగిపోయారు. ఆయన ప్రదర్శించిన హుందాతనం, సహజత్వం సినిమాకు ప్రధాన బలంగా నిలిచాయి. ముఖ్యంగా రైలులో బ్రిటిష్ అధికారితో జరిగే సంభాషణ, అండర్‌గ్రౌండ్ టన్నెల్‌లో శివుని ప్రతిరూపం కనిపించే దృశ్యం, అలాగే అద్భుతమైన నేపథ్య సంగీతం సినిమాను మరో స్థాయికి తీసుకెళ్లాయి. కేవలం 2 కోట్ల బడ్జెట్ అయినప్పటికీ ప్రొడక్షన్ డిజైన్ పాత కాలాన్ని కళ్ళకు కట్టినట్లుగా ఆవిష్కరించింది.