ఒకవేళ తనపై దాడి లేదా హత్యాయత్నం జరిగితే ఇరాన్‌పై వెంటనే ప్రతీకార చర్యలు చేపట్టాలని అమెరికా సైన్యానికి ఇప్పటికే స్పష్టమైన ఆదేశాలు జారీ చేసినట్లు ట్రంప్ వెల్లడించారు. “నేను ఇప్పటికే ఆర్డర్స్ ఇచ్చేశాను. ఒక సంవత్సరం పాటు (అవసరమైతే పొడిగించేలా) ఇరాన్‌లోని అన్ని ప్రాంతాలను పూర్తిగా నాశనం చేయడానికి, నామరూపాలు లేకుండా చేయడానికి యూఎస్ మిలిటరీ పూర్తి సంసిద్ధతతో ఉంది,” అని ట్రంప్ స్పష్టం చేశారు.

ట్రంప్‌ను హతమార్చేందుకు ఇరాన్ సరికొత్త కుట్ర పన్నుతోందంటూ ఇజ్రాయెల్ ఇంటెలిజెన్స్ వర్గాలు వాషింగ్టన్‌ను అప్రమత్తం చేసిన మరుసటి రోజే ట్రంప్ ఈ ఘాటు వ్యాఖ్యలు చేయడం గమనార్హం. ‘ది వాల్ స్ట్రీట్ జర్నల్’ కథనం ప్రకారం.. ఇరాన్ ప్లాన్ చేస్తున్న ఈ రహస్య హత్యాయత్నం తాలూకు నివేదికను ఇజ్రాయెల్ అమెరికాకు షేర్ చేసింది. గత కొన్ని వారాలుగా ట్రంప్‌కు ఉన్న ముప్పుపై అమెరికా ఇంటెలిజెన్స్ ఏజెన్సీలకు సమాచారం అందుతున్నప్పటికీ, నిర్దిష్టమైన ప్లాన్‌ను ఎత్తిచూపుతూ హెచ్చరించడం మాత్రం ఇదే మొదటిసారి అని సీఎన్ఎన్ (CNN) నివేదించింది.

ఇరు దేశాల మధ్య నెలకొన్న ఉద్రిక్తతల నేపథ్యంలో ఇరాన్ కోరిక మేరకు చర్చలు కొనసాగించడానికి అమెరికా అంగీకరించిందని ట్రంప్ తెలిపారు. అయితే, ఇరు పక్షాల మధ్య కుదిరిన తాత్కాలిక కాల్పుల విరమణ (Cease Fire) మాత్రం ముగిసిపోయిందని ఆయన స్పష్టం చేశారు. “మళ్లీ చర్చలు జరుపుదామని ఇరాన్ కోరింది. అందుకు మేము ఓకే చెప్పాం. కానీ ‘కాల్పుల విరమణ’ ముగిసిపోయిందనే విషయాన్ని ఎలాంటి సందేహాలు లేకుండా అమెరికా వారికి స్పష్టంగా తేల్చి చెప్పింది,” అని శుక్రవారం నాటి పోస్ట్‌లో పేర్కొన్నారు.