ఈ సందర్భంగా విడుదల చేసిన పోస్టర్ సోషల్ మీడియాను షేక్ చేస్తోంది. ”అజ్ఞాతపర్వం ముగిసింది.. తిరుగుబాటు మొదలవుతోంది” అనే పవర్‌ఫుల్ క్యాప్షన్‌తో ఉన్న ఈ పోస్టర్‌లో ప్రభాస్ ఊరమాస్ లుక్ కట్టిపడేస్తోంది. శవాల గుట్టల మధ్య, రక్తం అంటిన దేహంతో, షర్ట్ లేకుండా ఒక బండరాయిపై ప్రభాస్ తీక్షణంగా చూస్తూ కూర్చున్న తీరు ఫ్యాన్స్ కు పూనకాలు తెప్పిస్తోంది. చేతిలో ఒక భారీ తుపాకీ పట్టుకుని, ఒంటిపై జంధ్యం కనిపిస్తుండటం ఈ కథలోని పాత్రపై మరింత క్యూరియాసిటీని పెంచుతోంది. సలార్, కల్కి 2898 ఏడీ లాంటి బ్లాక్ బస్టర్స్ తర్వాత వస్తున్న సినిమా కావడంతో పాన్ ఇండియా స్థాయిలో ఈ లుక్ వైరల్ అవుతోంది.

ఈ ప్రతిష్టాత్మక చిత్రంలో ప్రభాస్ సరసన పాపులర్ సోషల్ మీడియా ఇన్‌ఫ్లుయెన్సర్ ఇమాన్ ఎస్మాయిల్ హీరోయిన్‌గా ఎంట్రీ ఇస్తోంది. సీనియర్ నటి జయప్రద, బాలీవుడ్ దిగ్గజాలు మిథున్ చక్రవర్తి, అనుపమ్ ఖేర్, రాజేష్ శర్మ తదితరులు కీలక పాత్రలు పోషిస్తున్నారు. సంగీత దర్శకుడు విశాల్ చంద్రశేఖర్ ఈ చిత్రానికి స్వరాలు సమకూరుస్తుండగా, జాతీయ అవార్డు గ్రహీత కమల్ కణ్ణన్ విజువల్ ఎఫెక్ట్స్ (VFX) సూపర్‌వైజర్‌గా వ్యవహరిస్తున్నారు. కోటగిరి వెంకటేశ్వరరావు ఎడిటింగ్ బాధ్యతలు చూస్తున్నారు.