ప్రముఖ న్యూస్ ఏజెన్సీ ఏఎన్ఐ(ANI) నివేదిక ప్రకారం గౌరీ స్ప్రాట్‌తో ఆమిర్ ఖాన్ వివాహంపై చీఫ్ ముఫ్తీ చౌదరి ఇఫ్రాహిమ్ హుస్సేన్ ఒక ఫత్వా జారీ చేశారు. ఒక ముస్లిం పురుషుడు ముస్లిమేతర మహిళను వివాహం చేసుకోవడం ‘నజాయజ్’ (అనుమతించబడనిది) ‘హరామ్’ (నిషిద్ధం) అని ఆయన పేర్కొన్నారు. ఆమిర్ ఖాన్ సరిగ్గా ఇదే పని చేశారు. దీనికి సంబంధించి వివిధ ప్రాంతాల్లో నిరసనలు వ్యక్తమయ్యాయి. తత్ఫలితంగా, ఆమిర్ ఖాన్ మూడవ వివాహానికి వ్యతిరేకంగా ఆయన ఫత్వా జారీ చేశారు. ఈ విషయంపై చీఫ్ ముఫ్తీ కామెంట్స్ ఇలా ఉన్నాయి. ఆయన ఏమన్నారో చూద్దాం.

విశ్వాసం గల ముస్లిం పురుషుడు విశ్వాసం గల ముస్లిం స్త్రీని వివాహం చేసుకోవడం ఖురాన్‌లో అల్లాహ్ అనుమతించాడు. ముస్లిమేతర స్త్రీలను వివాహం చేసుకోకూడదని కూడా ఆజ్ఞాపించబడింది. వివాహం చేసుకుని, భార్యను విడిచిపెట్టి, మళ్ళీ వివాహం చేసుకుని ఆమెను కూడా విడిచిపెట్టడం తప్పు. నికాహ్ (వివాహం) అనేది ఒక పవిత్రమైన , కట్టుబడి ఉండే ఒడంబడిక. దానిని ఉల్లంఘించడం పాపం. ఒక పురుషుడు తన వివాహంలో న్యాయాన్ని అందించలేకపోతే అతను రెండవ లేదా మూడవ వివాహం చేసుకోవడానికి అనుమతి లేదు. ఆమిర్ ఖాన్ ఇటీవల ఒక ముస్లిమేతర మహిళను మూడవ వివాహం చేసుకున్నారు. దీనివల్ల పలు చోట్ల నిరసనలు వ్యక్తమయ్యాయి. ఈ నేపథ్యంలో, మన ముస్లిమేతర సోదరులు ఇస్లాంను తప్పుగా అర్థం చేసుకోకుండా ఉండేందుకు మేము అల్లాహ్ ఆజ్ఞలను పాటిస్తామని చెప్పడం జరిగింది.

ఆమీర్ ఖాన్, గౌరీ స్ప్రాట్‌ వివాహానికి వ్యతిరేకంగా బజరంగ్ దళ్ సభ్యులు నిరసన తెలిపారు. నిరసనకారులు నటుడి దిష్టిబొమ్మను కూడా దహనం చేసి, ఈ వివాహాన్ని ‘లవ్ జిహాద్’గా అభివర్ణించారు. నటుడు పదేపదే హిందూ మహిళలను వివాహం చేసుకుంటూ ఉద్దేశపూర్వకంగా హిందూ సమాజాన్ని అవమానిస్తున్నాడని బజరంగ్ దళ్ నాయకుడు ఒకరు పేర్కొన్నారు.

ఆమీర్ ఖాన్ 1986లో మొదట రీనా దత్తాను వివాహం చేసుకున్నారు. ఈ వివాహం ద్వారా వారికి ఐరా ఖాన్, జునైద్ ఖాన్ అనే ఇద్దరు పిల్లలు కలిగారు. 2002లో వారు విడాకులు తీసుకున్నారు. ఆ తర్వాత ఆమిర్ ఖాన్ మళ్లీ వివాహం చేసుకున్నారు. ఆయన 2005లో చిత్ర దర్శకురాలు కిరణ్ రావును వివాహం చేసుకున్నారు. వారికి ఆజాద్ అనే కుమారుడు ఉన్నాడు. అయితే ఈ వివాహం 2021లో ముగిసింది. ఇప్పుడు 2026 జూలై 5న, ఆమిర్ ఖాన్ గౌరీ స్ప్రాట్‌ను వివాహం చేసుకున్నారు.