ఆయన మంగళవారం లేదా బుధవారం తెలంగాణ శాసనమండలి చైర్మన్ గుత్తా సుఖేందర్‌రెడ్డిని స్వయంగా కలిసి తన రాజీనామా పత్రాన్ని సమర్పించనున్నట్లు సమాచారం. పార్టీ క్రమశిక్షణను ఉల్లంఘించి వివాదాల్లో చిక్కుకున్న మీర్జా రహ్మత్ బేగ్‌పై ఎంఐఎం అధినేత, హైదరాబాద్ ఎంపీ అసదుద్దీన్ ఒవైసీ తీవ్ర స్థాయిలో ఆగ్రహం వ్యక్తం చేశారు. పార్టీ గౌరవానికి భంగం వాటిల్లే చర్యలను ఎంతమాత్రం సహించేది లేదని స్పష్టం చేసిన అధినేత, వెంటనే ఎమ్మెల్సీ పదవి నుంచి తప్పుకోవాలని ఆదేశించారు. అంతేకాకుండా, పార్టీకి సంబంధించిన సమగ్ర రికార్డులతో పాటు, ఎమ్మెల్సీ క్యాంప్ కార్యాలయం నుంచి వివిధ ప్రభుత్వ శాఖల అధికారులకు జారీ చేసిన అధికారిక లేఖల ప్రతులను తక్షణమే దారుస్సలాంలోని పార్టీ కేంద్ర కార్యాలయానికి అప్పగించాలని ఆదేశాలు జారీ చేశారు. అధిష్ఠానం నిర్ణయాన్ని పార్టీ సీనియర్ నేతల ద్వారా తెలుసుకున్న రహ్మత్ బేగ్.. తన పదవికి రాజీనామా చేయడానికి అంగీకరించినట్లు తెలిసింది.