Last Updated:
ఆసియా క్రీడలు 2026 పురుషుల హాకీ ఫైనల్లో భారత్ 5-1 తేడాతో మలేషియాపై ఘనవిజయం సాధించింది. టైటిల్ నిలబెట్టుకుని వరుసగా రెండో స్వర్ణం గెలవడంతో పాటు 2028 లాస్ ఏంజెల్స్ ఒలింపిక్స్కు నేరుగా బెర్తు ఖరారు చేసుకుంది.
జపాన్‌లోని ఐచి-నగోయా వేదికగా జరుగుతున్న ఆసియా క్రీడలు 2026 పురుషుల హాకీ పోటీల్లో భారత జట్టు తిరుగులేని ఆధిపత్యాన్ని ప్రదర్శించింది. శనివారం జరిగిన హోరాహోరీ ఫైనల్ సమరంలో బలమైన మలేషియాను 5-1 గోల్స్ తేడాతో చిత్తు చేసి భారత ఆటగాళ్లు బంగారు పతకాన్ని ముద్దాడారు. ఆసియా క్రీడల చరిత్రలోనే భారత పురుషుల హాకీ జట్టు వరుసగా రెండోసారి స్వర్ణ పతకాన్ని కాపాడుకోవడం ఇదే ప్రథమం. మ్యాచ్ 11వ నిమిషంలో కెప్టెన్ హర్మన్‌ప్రీత్ సింగ్ పెనాల్టీ కార్నర్‌ను గోల్‌గా మలిచి జట్టుకు శుభారంభం ఇచ్చాడు. అయితే 14వ నిమిషంలో మలేషియా ఆటగాడు షెల్లో సిల్వేరియస్ గోల్ కొట్టడంతో తొలి క్వార్టర్ 1-1తో ముగిసింది.
రెండో క్వార్టర్‌లో జుగ్‌రాజ్ సింగ్ పెనాల్టీ కార్నర్‌తో భారత్‌కు మళ్లీ ఆధిక్యం తెచ్చిపెట్టాడు. అనంతరం మూడో క్వార్టర్‌లో హార్దిక్ సింగ్ పెనాల్టీ స్ట్రోక్ ద్వారా స్కోరును 3-1కి పెంచాడు. చివరి క్వార్టర్‌లో శిలానంద్ లక్రా అద్భుతమైన ఫీల్డ్ గోల్ నమోదు చేయగా, చివర్లో హర్మన్‌ప్రీత్ మరో పెనాల్టీ కార్నర్‌తో 5-1తో ఘన విజయాన్ని ఖరారు చేశాడు.
ఒకే ఆసియా క్రీడల ఎడిషన్‌లో భారత పురుషులు, మహిళల జట్లు రెండూ హాకీలో బంగారు పతకాలు సాధించడం చరిత్రలో ఇదే మొదటిసారి. శుక్రవారం జరిగిన ఉత్కంఠభరిత ఫైనల్లో భారత మహిళల జట్టు 1-0 తేడాతో బలమైన చైనాను ఓడించి 44 ఏళ్ల సుదీర్ఘ నిరీక్షణ తర్వాత స్వర్ణాన్ని కైవసం చేసుకుంది. ఇప్పుడు పురుషుల జట్టు కూడా ఛాంపియన్‌గా నిలవడంతో భారత హాకీ క్రీడా చరిత్రలో సరికొత్త అధ్యాయం లిఖితమైంది.
ఈ చిరస్మరణీయ విజయంతో భారత పురుషుల జట్టు 2028 లాస్ ఏంజెల్స్ ఒలింపిక్స్కు నేరుగా అర్హత సాధించింది. గత కొద్ది నెలలుగా కాస్త బలహీనంగా కనిపించిన భారత డిఫెన్స్ విభాగం ఈ ఫైనల్ మ్యాచ్‌లో అద్భుతంగా రాణించి ప్రత్యర్థి దాడులను సమర్థంగా తిప్పికొట్టింది.
ఈ ఆసియా క్రీడల్లో భారత్‌కు ఇదే చివరి ఈవెంట్ కావడం విశేషం. ఈ అద్భుత విజయంతో భారత పతకాల సంఖ్య 85కి చేరగా, అందులో స్వర్ణాల సంఖ్య ఏకంగా 21కి చేరింది. దేశవ్యాప్తంగా క్రీడా వర్గాలు, అభిమానులు హాకీ విజేతలపై ప్రశంసల జల్లు కురిపిస్తున్నారు.
