రష్యాకు చెందిన ప్రముఖ ఎయిర్‌లైన్స్ సంస్థ ‘స్మార్ట్‌ఏవియా’ (Smartavia) ద్వారా నడుపబడుతున్న ‘బోయింగ్ 737-800’ (Boeing 737-800) విమానం సోచి (Sochi) నుండి అర్ఖంగెల్స్క్ (Arkhangelsk) నగరానికి ప్రయాణికులతో బయలుదేరింది. అయితే, నల్లసముద్రం (Black Sea) మీదుగా ప్రయాణిస్తున్న సమయంలో విమానంలో సాంకేతిక సమస్య తలెత్తింది. దీంతో విమాన పైలట్లు వెంటనే అత్యవసర లేదా ప్రమాదకర పరిస్థితిని సూచించే ‘7700’ ఎమర్జెన్సీ కోడ్ ద్వారా సిగ్నల్ పంపారు. ఆ సంకేతాలు పంపిన క్షణాల వ్యవధిలోనే విమానం రాడార్ పరిధి నుంచి పూర్తిగా అదృశ్యమవడంతో విమానయాన అధికారులు తీవ్ర ఆందోళనకు గురయ్యారు.

రాడార్ నుండి అదృశ్యమైనప్పటికీ, కొద్దిసేపటికే ఆ విమానం మళ్లీ సిగ్నల్‌ పరిధిలోకి వచ్చింది. సోచి విమానాశ్రయంలో సురక్షితంగా ల్యాండ్ అవ్వడానికి ముందు.. విమాన బరువును తగ్గించుకోవడం కోసం ఆకాశంలోనే కొంత ఇంధనాన్ని మండించినట్లు (Burning off fuel) సమాచారం. రాత్రి సుమారు 11:30 గంటల ప్రాంతంలో ఆ విమానం సోచి ఎయిర్‌పోర్టులో అత్యవసరంగా ల్యాండ్ అయింది. ప్రాథమిక సమాచారం ప్రకారం.. విమాన ఇంజిన్‌లో తలెత్తిన లోపం (Engine Failure) వల్లే పైలట్లు ఆపద సంకేతాలు పంపినట్లు తెలిసింది. ఈ అత్యవసర ల్యాండింగ్‌లో ప్రయాణికులకు గానీ, సిబ్బందికి గానీ ఎలాంటి ప్రమాదం జరగలేదని, అందరూ సురక్షితంగా ఉన్నారని రష్యా అధికారులు ధృవీకరించారు.