ప్రధానమంత్రి నరేంద్ర మోదీ ప్రత్యేకంగా సమయం కేటాయించి స్మిత్‌‌తో మాట్లాడటం తమ కుటుంబానికి కొండంత ధైర్యాన్ని ఇచ్చిందని సోనాల్ న్యూస్18 తో తెలిపారు. ఒక దేశ ప్రధాని స్వయంగా ఒక సాధారణ పౌరుడి పరిస్థితిని అడిగి తెలుసుకోవడం చాలా గొప్ప విషయమంటూ మోదీకి కృతజ్ఞతలు తెలిపారు. 140 కోట్ల మంది భారతీయులు స్మిత్ ఆరోగ్యం కోసం ప్రార్థిస్తున్నారని ప్రధాని మోదీ యూపీఎస్సీ శతాబ్ది ఉత్సవాల ప్రసంగంలో పేర్కొన్న విషయాన్ని ఆమె గుర్తు చేసుకున్నారు.

స్మిత్ ఆరోగ్యం ప్రస్తుతం నిలకడగా ఉందని, ఆయన వేగంగా కోలుకుంటున్నారని సోనాల్ చెప్పారు. ఆ విమానంలో ఏం జరిగిందనే విషయాలను తాము ప్రస్తుతానికి ఆయనను అడిగి తెలుసుకోవడం లేదని వివరించారు. ఆ చేదు జ్ఞాపకాలను మళ్లీ తలచుకోవడం వల్ల ఆయన మనస్సుపై ప్రభావం పడే అవకాశం ఉందని, అందుకే మానసికంగా పూర్తిగా కోలుకునే వరకు వేచి చూస్తున్నామని తెలిపారు. అబుదాబి వైద్యులు, సైనిక వైద్యుల పర్యవేక్షణలో అత్యుత్తమ వైద్యం అందుతోందని, త్వరలోనే ఆయన క్షేమంగా ఇల్లు చేరుకుంటారని ఆశాభావం వ్యక్తం చేశారు.

స్మిత్ ప్రాణాలతో బయటపడాలని భారతదేశం నలుమూలల నుంచి ఎంతోమంది ప్రార్థనలు పంపించారని, ఆ ప్రేమను చూసి తాను మాటలు రాని స్థితిలో ఉన్నానని సోనాల్ చెప్పారు. ఇజ్రాయెల్ ప్రధాని బెంజమిన్ నెతన్యాహు కూడా స్మిత్‌ను నిజమైన హీరోగా అభివర్ణించారని గుర్తు చేశారు. ఆయనతో మాట్లాడే విషయంపై స్పందిస్తూ, స్మిత్ శారీరకంగా, మానసికంగా సంపూర్ణ స్వస్థత పొందిన తర్వాత నెతన్యాహుతో తప్పకుండా మాట్లాడతారని స్పష్టం చేశారు.