భారతీరాజా మరణవార్త తెలియగానే తమిళనాడు ముఖ్యమంత్రి సి. జోసెఫ్ విజయ్ తీవ్ర విచారం వ్యక్తం చేశారు. వెంటనే దర్శకుడి నివాసానికి చేరుకున్న సీఎం విజయ్.. భారతీరాజా పార్థివ దేహానికి పూలమాల వేసి చేతులెత్తి అంజలి ఘటించారు. ఆయన కుటుంబ సభ్యులను పరామర్శించి, తన గాఢ సానుభూతిని తెలియజేశారు. భారతీరాజా అంత్యక్రియలను పూర్తి ప్రభుత్వ అధికారిక లాంఛనాలతో (State Honours) నిర్వహించనున్నట్లు ముఖ్యమంత్రి ప్రకటించారు. సీఎం విజయ్ నివాళులర్పించిన విజువల్స్ ప్రస్తుతం సోషల్ మీడియాలో వైరల్ అవుతున్నాయి. డీఎంకే అధినేత ఎం.కె. స్టాలిన్, ఏఐఏడీఎంకే ప్రధాన కార్యదర్శి ఎడప్పాడి పళనిస్వామి సహా పలువురు రాజకీయ, సినీ ప్రముఖులు ఆయనకు నివాళులర్పించారు.

భారతీరాజాకు తెలుగు చిత్రసీమతోనూ ఎంతో ప్రత్యేకమైన అనుబంధం ఉంది. ఆయన దర్శకత్వం వహించిన క్లాసిక్ ప్రేమకథా చిత్రం ‘సీతాకోకచిలుక’ (1981) తెలుగులో సంచలన విజయం సాధించింది. ఈ చిత్రానికిగానూ ఆయన ఉత్తమ జాతీయ చిత్ర అవార్డుతో పాటు నంది అవార్డును కూడా సొంతం చేసుకున్నారు. అలాగే ‘ఆరాధన’, ‘పసలపూడి వీరబాబు’ వంటి చిత్రాలు తెలుగు ప్రేక్షకులకు ఎప్పటికీ గుర్తుండిపోతాయి. కార్తీక్, రాధ, రేవతి, రాధిక, విజయశాంతి వంటి ఎందరో మేటి నటీనటులను వెండితెరకు పరిచయం చేసిన ఘనత ఆయనదే.

సినిమా రంగానికి ఆయన చేసిన అద్భుత సేవలను గుర్తించిన కేంద్ర ప్రభుత్వం 2004లో భారతీరాజాను ‘పద్మశ్రీ’ పురస్కారంతో సత్కరించింది. తన సుదీర్ఘ కెరీర్‌లో ఆయన మొత్తం 6 జాతీయ చలనచిత్ర అవార్డులను అందుకోవడమే కాకుండా, పలు ఫిలింఫేర్, రాష్ట్ర ప్రభుత్వ అవార్డులను కైవసం చేసుకున్నారు. కేవలం దర్శకుడిగానే కాకుండా.. ‘ఆయుధ ఎళుతు’, ‘తిరుచిత్రంబలమ్’, ‘మహారాజ’ వంటి చిత్రాల్లో అద్భుత నటనతో నటుడిగానూ మెప్పించారు. 1974లో చంద్రలీలను వివాహం చేసుకున్న ఆయనకు కుమార్తె జనని ఉన్నారు. ఆయన కుమారుడు, నటుడు మనోజ్ భారతీరాజా 2025లో గుండెపోటుతో మరణించిన సంగతి తెలిసిందే. భారతీరాజా మరణం యావత్ భారత చలనచిత్ర రంగానికి తీరని లోటని సినీ వర్గాలు పేర్కొంటున్నాయి.