తనకు చిన్నప్పటి నుంచే సినిమాలపై ఆసక్తి ఎలా కలిగిందో జాసన్ వివరించాడు. “చిన్న వయసులో నాన్నతో పాటు తరచుగా షూటింగ్ సెట్స్‌కి వెళ్లేవాడిని. అక్కడ వాతావరణం, సినిమా తీసే విధానం నన్ను ఎంతగానో ఆకట్టుకునేది. మొదట్లో నేను పైలట్ కావాలని కలలు కన్నాను, ఆ తర్వాత కొన్నాళ్లకు క్రికెటర్ అవ్వాలనిపించింది. కానీ, ఇంటర్మీడియట్ చదువుతున్న సమయంలో సినిమాలపై నా ఆసక్తి పూర్తిగా పెరిగింది” అని తెలిపాడు. చిన్నప్పటి నుంచి కథలు అల్లడం, వాటిని స్నేహితులకు చెప్పడం తన హాబీ అని, ఆ తర్వాత వాటిని కాగితంపై రాయడం అలవాటుగా మారిందని చెప్పాడు. తనలోని దర్శకుడిని గుర్తించి, కెనడాలో ఫిల్మ్ మేకింగ్‌లో ప్రత్యేక శిక్షణ తీసుకున్నానని, అప్పుడే తాను భవిష్యత్తులో ఏం చేయాలనే దానిపై పూర్తి క్లారిటీ వచ్చిందని జాసన్ స్పష్టం చేశాడు.

జాసన్ సంజయ్ ‘సిగ్మా’ (Sigma) అనే సినిమాతో దర్శకుడిగా పరిచయం అవుతున్నాడు. టాలీవుడ్, కోలీవుడ్ ప్రేక్షకులకు సుపరిచితమైన టాలెంటెడ్ యాక్టర్ సందీప్ కిషన్ ఇందులో హీరోగా నటిస్తున్నాడు. ప్రముఖ అగ్ర నిర్మాణ సంస్థ లైకా ప్రొడక్షన్స్ భారీ బడ్జెట్‌తో ఈ చిత్రాన్ని నిర్మిస్తోంది. వాస్తవానికి ఈ సినిమా జూలై 31న థియేటర్లలోకి రావాల్సి ఉండగా, కొన్ని సాంకేతిక కారణాల వల్ల విడుదల వాయిదా పడినట్లు సమాచారం. దళపతి వారసుడి తొలి సినిమా కావడంతో సౌత్ ఇండస్ట్రీలో ఈ ప్రాజెక్ట్‌పై భారీ అంచనాలు నెలకొన్నాయి.