హోమీ అదజానియా దర్శకత్వంలో తెరకెక్కిన ఈ చిత్రం 2012లో వచ్చిన ‘కాక్‌టెయిల్’కు సీక్వెల్ అయినప్పటికీ, మొదటి భాగంతో పోలికలు లేకుండా కొత్త తరహా ప్రేమకథగా రూపొందించారని తరణ్ ఆదర్శ్ వెల్లడించారు. ఆధునిక ప్రేమ కథల స్ఫూర్తిని, భావోద్వేగాలను సమపాళ్లలో మేళవిస్తూ సినిమా ప్రేక్షకులను ఆకట్టుకుంటుందని ఆయన అభిప్రాయపడ్డారు.

లవ్ రంజన్, తరుణ్ జైన్ అందించిన కథ, స్క్రీన్‌ప్లే సినిమాకు ప్రధాన బలంగా నిలిచాయని పేర్కొన్నారు. సంగీతం, విజువల్స్, డైలాగ్స్, భావోద్వేగాలు అన్ని అంశాల్లోనూ సినిమా మంచి మార్కులు కొట్టేసిందని అన్నారు. ముఖ్యంగా ఇటలీ నేపథ్యంలో సాగే ఫస్ట్ హాఫ్ అద్భుతమైన విజువల్స్‌తో ప్రేక్షకులను ఆకట్టుకుంటుందని తెలిపారు. పాటలు, ప్రధాన తారల మధ్య కెమిస్ట్రీ, అనూహ్య ట్విస్టులు ఈ భాగాన్ని మరింత ప్రత్యేకంగా నిలబెడతాయని చెప్పారు.

సెకండాఫ్‌లో డ్రామా మరింత ఉత్కంఠభరితంగా సాగుతుందని, క్లైమాక్స్‌కు ముందు వచ్చే కొన్ని సన్నివేశాలు కొద్దిగా బలహీనంగా అనిపించినప్పటికీ, చివరికి సినిమా పూర్తి సంతృప్తిని కలిగిస్తుందని తరణ్ ఆదర్శ్ పేర్కొన్నారు.

నటీనటుల విషయానికి వస్తే, షాహిద్ కపూర్ తన కెరీర్‌లో మరో అద్భుతమైన నటనను కనబరిచారని కొనియాడారు. భావోద్వేగ సన్నివేశాలతో పాటు సరదా క్షణాల్లో కూడా ఆయన నటన ఆకట్టుకుంటుందని చెప్పారు. ముఖ్యంగా చివరి దశలో వచ్చే కీలక సన్నివేశాల్లో షాహిద్ నటన ప్రేక్షకులను కట్టిపడేస్తుందని వెల్లడించారు.

ఇక కృతి సనన్ తన కెరీర్‌లోనే అత్యుత్తమ నటనను కనబరిచారని తరణ్ ప్రశంసించారు. రష్మిక మందన్న పాత్రకు సినిమాలో పెద్దగా ప్రాధాన్యత దక్కలేదని, ఆమెకు నటనకు ఎక్కువ అవకాశాలు లభించలేదని అభిప్రాయపడ్డారు. అలాగే హిందీ ఉచ్చారణ విషయంలో రష్మిక మరింత మెరుగుపడాల్సిన అవసరం ఉందని పేర్కొన్నారు.

దినేశ్ విజన్, లవ్ రంజన్, అంకుర్ గార్గ్ సంయుక్తంగా నిర్మించిన ఈ చిత్రానికి హోమీ అదజానియా దర్శకత్వం వహించగా, తరుణ్ జైన్, లవ్ రంజన్ స్క్రీన్‌ప్లే అందించారు. జూన్ 19, 2026న ప్రేక్షకుల ముందుకు రానున్న ఈ చిత్రంపై బాలీవుడ్‌లో భారీ అంచనాలు నెలకొన్నాయి.