Crude Oil: ముడిచమురు (Crude Oil) ధరలు ఒక్కసారిగా భగ్గుమనడంతో అంతర్జాతీయ మార్కెట్లు శుక్రవారం తీవ్ర ఒత్తిడికి లోనయ్యాయి. ఇంధన ధరల పెరుగుదల ద్రవ్యోల్బణ భయాలను మళ్లీ తెరపైకి తేవడంతో బాండ్ ఈల్డ్స్ భారీగా పెరిగాయి. దీనివల్ల ప్రపంచవ్యాప్తంగా ఉన్న సెంట్రల్ బ్యాంకులు వడ్డీ రేట్లను మరింత కాలం పాటు గరిష్ట స్థాయిలోనే కొనసాగించవచ్చనే అంచనాలు మార్కెట్లను కుదిపేశాయి. రాత్రికి రాత్రే బ్రెంట్ క్రూడ్ ఫ్యూచర్స్ దాదాపు 6 శాతం ఎగబాకి బ్యారెల్‌కు 109.97 డాలర్లకు చేరుకుంది. మధ్యప్రాచ్యంలో కీలకమైన జలమార్గాల్లో అంతరాయాలు ఏర్పడటం, ప్రపంచవ్యాప్తంగా ఇంధన సరఫరాపై తీవ్ర ఆందోళనలు రేకెత్తడంతో క్రూడ్ ఆయిల్ నాలుగు నెలల గరిష్ట స్థాయిని నమోదు చేసింది.