చెన్నై చెపాక్ స్టేడియం వేదికగా సన్ రైజర్స్ హైదరాబాద్‌తో జరుగుతున్న కీలక మ్యాచ్‌లో సీఎస్కే భారీ స్కోర్ సాధించింది. టాస్ గెలిచి బ్యాటింగ్ ఎంచుకున్న ఆతిథ్య జట్టు నిర్ణీత 20 ఓవర్లలో 7 వికెట్లు కోల్పోయి 180 పరుగులు సాధించింది. డేవాల్డ్ బ్రేవిస్ 44 (2 ఫోర్లు, 4 సిక్సులు), కార్తిక్ శర్మ 32 (3 ఫోర్లు, 2 సిక్సులు) మినహా మిగతా బ్యాటర్లు పెద్దగా రాణించలేకపోయారు. చెన్నై ఆరంభంలో వేగంగా పరుగులు సాధించింది. సంజూ శాంసన్ 27 (5 ఫోర్లు, 1 సిక్స్) క్రీజులో ఉన్నంతసేపు స్కోర్ బోర్డును పరిగెత్తించాడు. కానీ భారీ స్కోర్ చేయలేకపోయాడు. ఇక కెప్టెన్ రుతురాజ్ (15), ఉర్విల్ పటేల్ (13), శివమ్ దూబే (26).. ఇలా కీలక బ్యాటర్లంతా తక్కువ పరుగులకే ఔటయ్యారు. హైదరాబాద్ బౌలర్లలో పాట్ కమిన్స్ 3 వికెట్లు పడగొట్టి సత్తా చాటగా.. సాకిబ్ హుసేన్ 2, మలింగ, ప్రఫుల్ హింగే చోరో వికెట్ తీసుకున్నారు.