కథ:

హైదరాబాద్‌కు చెందిన మున్నా (హర్షిత్ రెడ్డి) జీవితంలో ఎలాంటి లక్ష్యం లేని ఒక సాధారణ మధ్యతరగతి కుర్రాడు. డిగ్రీ పూర్తయినా ఉద్యోగం చేయకుండా స్నేహితులతో జల్సాలు చేస్తూ తిరుగుతుంటాడు. తండ్రి శేఖర్ (నరేష్) కష్టపడుతూ కొడుకును ప్రాణంగా చూసుకుంటున్నా, మున్నాకు మాత్రం బాధ్యత తెలియదు. అలాంటి సమయంలో ఒక మీ సేవ సెంటర్‌లో పనిచేసే అమూల్య (స్మేహా మణిమేఘలై)ను చూసి మున్నా తొలిచూపులోనే ప్రేమలో పడతాడు.

ఆమె ప్రేమను ఎలాగైనా గెలవాలని ప్రయత్నిస్తున్న మున్నాకు అమూల్య ఒక కఠినమైన షరతు విధిస్తుంది. “నేనే నెలకు రూ. 20 వేలు సంపాదిస్తున్నాను. కనీసం అంత కూడా సంపాదించలేని నువ్వు.. ముందు ఒక ప్రభుత్వ ఉద్యోగం సాధించి నా ముందుకు రా, అప్పుడే ఆలోచిస్తా” అని గట్టిగా చెప్పేస్తుంది. మరి అమూల్య అంత మాట ఎందుకు అనాల్సి వచ్చింది? బాధ్యత లేని మున్నా ఆమె కోసం కష్టపడి ప్రభుత్వ ఉద్యోగం సాధించాడా? చివరకు వీరి ప్రేమ కథ ఎలాంటి ముగింపునకు చేరింది? అనేదే మిగతా సినిమా.

విశ్లేషణ:

సినిమా ప్రారంభంలో సాధారణ రొటీన్ యూత్ సినిమాలా అనిపించినప్పటికీ, లవ్ ట్రాక్ మొదలయ్యాక కథలో వేగం పెరుగుతుంది. ముఖ్యంగా ఇంటర్వెల్ మలుపు కథను పూర్తిగా మారుస్తుంది. సెకండ్ హాఫ్‌లో వచ్చే తండ్రి-కొడుకుల సెంటిమెంట్ దృశ్యాలు ప్రేక్షకులను కంటతడి పెట్టిస్తాయి. పోలీస్ స్టేషన్ సీన్లలో సీనియర్ నటుడు నరేష్ నటన, తండ్రి విలువ గురించి రఘు కారుమంచి చెప్పే డైలాగులు గుండెకు హత్తుకుంటాయి. కేవలం ప్రేమకథగానే కాకుండా, బాధ్యత, కుటుంబ విలువలను చూపించడంలో దర్శకుడు విజయం సాధించాడని చెప్పుకోవాలి. కొన్ని చోట్ల హీరో ఒకే ప్రయత్నంలో గవర్నమెంట్ జాబ్ కొట్టడం లాంటి సీన్లలో లాజిక్స్ వెతకకుండా సినిమాటిక్ లిబర్టీగా సరిపెట్టుకోవాలి.

సాంకేతిక విభాగం, నటీనటుల ప్రతిభ:

మున్నా పాత్రలో హర్షిత్ రెడ్డి రెండు విభిన్నమైన షేడ్స్‌ను అద్భుతంగా పండించాడు. అమూల్యగా స్మేహా మణిమేఘలై తన సహజమైన నటన, అందంతో ఆకట్టుకుంది. సీనియర్ నటుడు నరేష్, ఝాన్సీ తమ అనుభవంతో ఎమోషనల్ సీన్లను నిలబెట్టారు. సాంకేతికంగా పచ్చిపులుసు వంశీ సినిమాటోగ్రఫీ హైదరాబాద్ లోకల్ లొకేషన్లను ఎంతో సహజంగా చూపించింది. ఈశ్వర్ చంద్ అందించిన సంగీతం, ముఖ్యంగా బ్యాక్‌గ్రౌండ్ స్కోర్ (BGM) సినిమాకు ప్రధాన బలంగా నిలిచింది.

ఓవరాల్‌గా చెప్పాలంటే.. ‘దీవానా’ చిత్రం నేటి యువతకు ఒక మంచి సందేశాన్ని ఇచ్చే స్వచ్ఛమైన, ఫీల్ గుడ్ ఎంటర్‌టైనర్.

రేటింగ్: 3