తదుపరి తరం బ్యాంకింగ్ టెక్నాలజీ కంపెనీ అయిన జీటా, తన కార్పొరేట్ సామాజిక బాధ్యత (సీఎస్ఆర్) కార్యక్రమంలో భాగంగా ఈ శిక్షణా కార్యక్రమానికి నిధులు సమకూరుస్తోంది. హైదరాబాద్‌తో పాటు బెంగళూరు, ముంబై నగరాల్లోనూ శిక్షణా కేంద్రాలను ఏర్పాటు చేసింది. పాఠ్యప్రణాళిక రూపకల్పన, శిక్షణా కేంద్రాల నిర్వహణ, శిక్షకుల ఫీజులు సహా కార్యక్రమానికి అవసరమైన ఖర్చులను జీటా భరిస్తోంది.

ప్రతి నగరంలోని కేంద్రంలో రెండు బ్యాచ్‌లకు శిక్షణ అందించనున్నారు. ఒక్కో బ్యాచ్‌లో 60 మంది చొప్పున యువతకు అవకాశం కల్పిస్తారు. ప్రతి బ్యాచ్‌కు మూడు నెలల పాటు శిక్షణ ఉంటుంది. అక్టోబర్ 10న హైదరాబాద్ కేంద్రంలో అధికారికంగా కార్యక్రమాన్ని ప్రారంభించారు. బెంగళూరు, ముంబై కేంద్రాల్లోనూ కార్యకలాపాలు ప్రారంభమయ్యాయి. ఆయా కేంద్రాల అధికారిక ప్రారంభోత్సవాలు రాబోయే నెలల్లో జరగనున్నాయి.

ఇండియా స్కిల్స్ రిపోర్ట్ 2026 ప్రకారం, దేశంలో ఉపాధియోగ్యత 56.35 శాతంగా ఉంది. అంటే ఉద్యోగాలకు అవసరమైన నైపుణ్యాలను అభ్యర్థులందరూ సమానంగా కలిగి ఉండటం లేదని ఈ గణాంకాలు సూచిస్తున్నాయి. ముఖ్యంగా వెనుకబడిన వర్గాలకు చెందిన యువతలో సాంకేతిక నైపుణ్యాలు, వ్యక్తిగత నైపుణ్యాల మధ్య అంతరం ఉండటం ఉపాధి అవకాశాలపై ప్రభావం చూపుతోంది.

ఈ సమస్యను తగ్గించేందుకు జీటా ప్రత్యేక శిక్షణా ప్రణాళికను రూపొందించింది. ఉద్యోగాలకు అవసరమైన నైపుణ్యాలను అందించడంతో పాటు, యువత సొంతంగా జీవనోపాధిని ఏర్పరచుకునేలా సిద్ధం చేయడంపై దృష్టి సారించింది.

ఏయే అంశాల్లో శిక్షణ ఇస్తారు?

హెడ్ హెల్డ్ హై ఫౌండేషన్‌కు చెందిన ‘మేక్ ఇండియా కేపబుల్’ కార్యక్రమం ద్వారా ఈ శిక్షణ అందిస్తున్నారు. ఇందులో ప్రధానంగా మూడు విభాగాలకు ప్రాధాన్యం ఇస్తారు.

కమ్యూనికేషన్ నైపుణ్యాలు: స్పష్టంగా మాట్లాడటం, ఆంగ్ల భాషలో మాట్లాడే సామర్థ్యాన్ని పెంచుకోవడం, ఆత్మవిశ్వాసంతో తమ అభిప్రాయాలను వ్యక్తం చేయడం.

డిజిటల్ నైపుణ్యాలు: రోజువారీ జీవితంలో, కార్యాలయాల్లో డిజిటల్ సాధనాలు, సాంకేతిక పరిజ్ఞానాన్ని సమర్థంగా ఉపయోగించడం.

కార్యాలయ నైపుణ్యాలు: వృత్తిపరమైన ప్రవర్తన, బృందంగా పనిచేయడం, ఉద్యోగ వాతావరణానికి అనుగుణంగా వ్యవహరించడం. ఈ నైపుణ్యాల ద్వారా యువత ఉద్యోగాల్లో చేరేందుకు, స్వయం ఉపాధి ప్రారంభించేందుకు అవసరమైన ప్రాథమిక సామర్థ్యాలను పెంపొందించుకోవచ్చని నిర్వాహకులు భావిస్తున్నారు.

జీటా ఇండియా ప్రెసిడెంట్ శివరామ్ కౌతా మాట్లాడుతూ.. భారతదేశంలో ఆశయాలు, లక్ష్యాలు ఉన్న యువతకు కొదవ లేదని, అయితే ఉద్యోగాలు పొందడానికి లేదా సొంతంగా జీవనోపాధిని ఏర్పాటు చేసుకోవడానికి అవసరమైన నైపుణ్యాలను అభివృద్ధి చేసుకునే అవకాశాలు కొందరికి పరిమితంగా ఉన్నాయని తెలిపారు. జీటా కేర్స్ ద్వారా సాంకేతిక, వ్యక్తిగత నైపుణ్యాలను అందించే ఆచరణాత్మక శిక్షణకు మద్దతు ఇస్తున్నామని చెప్పారు.

హెడ్ హెల్డ్ హై ఫౌండేషన్ సీఈఓ పంకజ్ సింగ్ ఠాకూర్ మాట్లాడుతూ.. యువత నేపథ్యంతో సంబంధం లేకుండా నైపుణ్య శిక్షణ అందరికీ అవకాశాలను విస్తరించాలని పేర్కొన్నారు. ఉద్యోగ రంగంలోకి ప్రవేశించడానికి, వ్యవస్థాపకతను కొనసాగించడానికి, స్వంత జీవనోపాధిని నిర్మించుకోవడానికి అవసరమైన నైపుణ్యాలు, ఆత్మవిశ్వాసాన్ని పెంపొందించడంలో ఈ కార్యక్రమం తోడ్పడుతుందని తెలిపారు.

జీటా ఇప్పటికే ‘ప్రాజెక్ట్ శిక్ష’ ద్వారా బెంగళూరులోని ప్రభుత్వ పాఠశాలల్లో రెండు కంప్యూటర్ ల్యాబ్‌లను ఏర్పాటు చేసింది. గత రెండేళ్లలో ఈ ల్యాబ్‌ల ద్వారా 600 మందికి పైగా విద్యార్థులకు కంప్యూటర్ విద్య, కోడింగ్, STEM అంశాలపై అవగాహన కల్పించినట్లు సంస్థ తెలిపింది.

పాఠశాల స్థాయిలో డిజిటల్ విద్యను ప్రోత్సహించడం నుంచి యువతకు ఉద్యోగ, స్వయం ఉపాధి అవకాశాలకు అవసరమైన శిక్షణ అందించడం వరకు తన కార్యక్రమాలను విస్తరిస్తున్నట్లు జీటా పేర్కొంది. హైదరాబాద్, బెంగళూరు, ముంబై నగరాల్లో ప్రారంభించిన ఈ శిక్షణా కేంద్రాలు యువతలో నైపుణ్యాభివృద్ధికి, ఉపాధి అవకాశాల విస్తరణకు దోహదపడాలన్నది సంస్థ లక్ష్యం.