కోల్‌కతా ప్రయాణంలో విమానంలో ఉండగానే రాజేష్ శర్మ ఆరోగ్య పరిస్థితి మరింత క్షీణించింది. ఆయన బాడీలో షుగర్ లెవెల్స్ అమాంతం పెరిగిపోవడంతో పాటు శ్వాస తీసుకోవడం కూడా అత్యంత కష్టంగా మారింది. దీంతో కోల్‌కతా చేరుకోగానే ఆయన్ను అక్కడి ఒక ప్రముఖ ప్రైవేట్ ఆసుపత్రిలోని అత్యవసర విభాగం (ICU)లో చేర్పించి చికిత్స అందిస్తున్నారు. విషపురుగు కుట్టిన కుడి కాలు పాదం నుండి మోకాలి వరకు ఇన్‌ఫెక్షన్ చాలా వేగంగా వ్యాపించిందని, ప్రభావిత ప్రాంతంలో పెద్ద బొబ్బలు కూడా ఏర్పడ్డాయని వైద్యులు తెలిపారు. ఇన్‌ఫెక్షన్ కారణంగా రక్తం గడ్డకట్టే ప్రమాదం ఉందని, ఒకవేళ ఆ గడ్డ ఊపిరితిత్తులకు చేరితే ప్రాణాపాయం ఉండే అవకాశం ఉందని వైద్యులు ఆందోళన వ్యక్తం చేస్తున్నారు.

ఇదిలా ఉంటే, ఈ వ్యవహారంలో ఒక ఊహించని మలుపు చోటుచేసుకుంది. రాజేష్ శర్మ ఆరోగ్యంపై సోషల్ మీడియాలో వస్తున్న వార్తలన్నీ అవాస్తవమని ఆయన అసిస్టెంట్ సుభాశిష్ పాండా పేర్కొన్నారు. ఈ మేరకు ఆయన ఒక వీడియో సందేశాన్ని విడుదల చేస్తూ.. “రాజేష్ శర్మ కేవలం సాధారణ హెల్త్ చెకప్‌లో భాగంగా, తన డయాబెటిస్ పరీక్షల కోసమే ఆసుపత్రికి వెళ్లారు. డాక్టర్లు అన్ని పరీక్షలు నిర్వహించారు, గురువారం ఉదయం ఆయన్ను డిశ్చార్జ్ చేస్తారు” అని తెలిపారు.