అయితే ఇంధనం ఆగిన వెంటనే విమానం అదుపు తప్పుతుందని కాదు. క్రూయిజింగ్ ఎత్తులో ఉన్న విమానానికి ఉండే గతి శక్తి (ఫార్వర్డ్ మొమెంటమ్) వల్ల, ఇంజిన్ల శక్తి లేకపోయినా అది గ్లైడర్ లాగా కొంత దూరం ప్రయాణించగలదు. కానీ ఇంజిన్లు విమానాన్ని ముందుకు తోయకపోవడంతో, ఇంజిన్లను మళ్లీ స్టార్ట్ చేయకపోతే లేదా ఇతర ప్రత్యామ్నాయ చర్యలు తీసుకోకపోతే విమానం వేగంగా ఎత్తును కోల్పోతూ కిందికి దిగిపోతుంది.

ఇలాంటి ఆధునిక జెట్ విమానాల్లో ఒక ఇంజిన్ ఆగిపోతే పైలట్లు దాన్ని ఎదుర్కొనేలా శిక్షణ పొందుతారు. కానీ రెండు ఇంజిన్లు ఒకేసారి ఆగిపోవడం అత్యంత తీవ్రమైన విపత్తుగా మారుతుంది.

తీవ్రంగా గాయపడినప్పటికీ కెప్టెన్ మచ్చార్ చాకచక్యంగా కాక్‌పిట్ తలుపు తెరిచే యంత్రాంగాన్ని ఆన్ చేశారు. దీంతో వెంటనే ప్రయాణికులు జోక్యం చేసుకుని నిందితుడిని అడ్డుకున్నారు. ఫ్లైట్ కంట్రోల్స్‌పై అవగాహన ఉన్న ఒక ప్రయాణికుడు విమానాన్ని స్థిరీకరించడంలో సాయపడగా, విమానంలో ప్రయాణిస్తున్న ఆఫ్-డ్యూటీ పైలట్లు ఇద్దరు వెంటనే కాక్‌పిట్‌‌లోకి వెళ్లి నియంత్రణ చేపట్టారు. చివరకు విమానాన్ని సౌదీ అరేబియాలోని తబుక్ నగరంలో సురక్షితంగా అత్యవసర ల్యాండింగ్ చేశారు.

ఫ్లైట్ ట్రాకింగ్ డేటా ప్రకారం, బోయింగ్ 737 మ్యాక్స్ 8 విమానం 34,000 అడుగుల ఎత్తు నుంచి కొద్ది సెకన్లలోనే 16,600 అడుగులకు పడిపోయింది. ఆ తర్వాత విమానం ఎమర్జెన్సీ కోడ్ ‘7700’, ఆపై హైజాకింగ్ లేదా చట్టవిరుద్ధ జోక్యాన్ని సూచించే ‘7500’ ట్రాన్స్‌పాండర్ కోడ్‌ను జారీ చేసింది.

ఒకవేళ ఇంజిన్ కటాఫ్ నిజమేనని తేలితే, కాక్‌పిట్‌లో దాడిని అడ్డుకోవడమే కాకుండా, ఇంజిన్లు ఆగిపోయి విమానం కుప్పకూలకుండా సెకన్ల వ్యవధిలో జరిగిన మరో పెను పోరాటం కూడా బయటపడినట్లే. ప్రస్తుతం యూఏఈ దర్యాప్తు బృందం ఫ్లైట్ డేటా రికార్డర్లు, డిజిటల్ ఆధారాలను పరిశీలిస్తోంది.