పోలీసులు వెల్లడించిన వివరాల ప్రకారం.. జోహన్నెస్‌బర్గ్‌ సమీపంలోని వెడెలా టౌన్‌షిప్‌లో ఉన్న ఒక బార్‌లో శనివారం రాత్రి జనం సందడిగా ఉన్న సమయంలో ఈ దారుణం జరిగింది. ఏకే-47 రైఫిళ్లు, అత్యాధునిక పిస్టళ్లతో ఆయుధాలు ధరించిన ఎనిమిది మంది దుండగులు ఒక్కసారిగా బార్‌లోకి చొరబడ్డారు. అక్కడున్న వారిపై ఎలాంటి కనికరం లేకుండా విచక్షణారహితంగా బుల్లెట్ల వర్షం కురిపించారు. ఈ దాడిలో ఘటనా స్థలంలోనే 17 మంది కుప్పకూలి మృతిచెందారు. మరో 15 మంది తీవ్ర గాయాలపాలవడంతో వారిని సమీప ఆసుపత్రులకు తరలించి చికిత్స అందిస్తున్నారు. కాల్పుల శబ్దాలతో ఆ ప్రాంతమంతా భీతావాహ వాతావరణం నెలకొంది.

ఈ దారుణం మరువకముందే, ఆదివారం తెల్లవారుజామున కేప్‌టౌన్ సమీపంలోని ల్యాండ్లే ప్రాంతంలో మరో కాల్పుల ఘటన వెలుగుచూసింది. అక్కడ ఉన్న ఒక దుకాణాన్ని లక్ష్యంగా చేసుకుని కొందరు సాయుధులు విచక్షణారహితంగా కాల్పులకు తెగబడ్డారు. ఈ ఘటనలో 10 మంది అక్కడికక్కడే మరణించగా, మరో 11 మంది తీవ్రంగా గాయపడ్డారు. క్షతగాత్రులను అత్యవసర చికిత్స నిమిత్తం ఆసుపత్రికి తరలించారు.

ఈ రెండు ఘోర సంఘటనలు జరగడానికి కొద్ది రోజుల ముందే డర్బన్ సమీపంలో ఒక ఇంట్లో జరిగిన ప్రైవేట్ పార్టీపై ముగ్గురు దుండగులు దాడి చేసి కాల్పులు జరిపిన విషయం విదితమే. ఆ ఘటనలో ఒక గర్భిణితో సహా మొత్తం 11 మంది ప్రాణాలు కోల్పోయారు. ఇలా వరుసగా జరుగుతున్న కాల్పుల ఉదంతాలతో దక్షిణాఫ్రికాలోని పలు టౌన్‌షిప్‌లలో ప్రజలు ప్రాణాలు అరచేతిలో పెట్టుకుని బతుకుతున్నారు. ఈ ఘటనలకు పాల్పడిన నిందితుల కోసం ప్రత్యేక పోలీసు బృందాలు విస్తృతంగా గాలింపు చర్యలు చేపట్టినప్పటికీ, ఇప్పటివరకు ఒక్కరిని కూడా అరెస్టు చేయకపోవడం గమనార్హం. వరుస హింసాత్మక ఘటనలతో శాంతిభద్రతల పరిస్థితిపై స్థానికులు తీవ్ర ఆగ్రహం, ఆందోళన వ్యక్తం చేస్తున్నారు.