కొద్దిసేపు గడిచాక పబ్ సిబ్బంది తీసుకొచ్చి చేతిలో పెట్టిన బిల్లు చూసి బాధితుడికి దిమ్మతిరిగిపోయింది. మొత్తం బిల్లు రూ.29,884గా అందులో నమోదు చేశారు. కేవలం ఒక్క బీరు తాగితే ఇంత బిల్లు ఎలా వస్తుందని, ఇది అన్యాయమని అతడు పబ్ సిబ్బందిని నిలదీశాడు. ఆ సమయంలోనే పథకం ప్రకారం రంగంలోకి దిగిన పబ్ బౌన్సర్లు, సిబ్బంది అతడి చుట్టూ చేరి గట్టిగా బెదిరింపులకు దిగారు. వివాదం ముదురుతుండటాన్ని గమనించిన సదరు యువతి.. తన వాటాగా రూ.18,000 ఆన్‌లైన్‌లో చెల్లించానంటూ ఫోన్ స్క్రీన్‌పై ఒక నకిలీ లావాదేవీని చూపించి, చాకచక్యంగా అక్కడి నుంచి మెల్లగా జారుకుంది. ఆ తర్వాత మిగిలిన బిల్లును బాధితుడే పూర్తిగా చెల్లించాలని బౌన్సర్లు తీవ్ర ఒత్తిడి తెచ్చారు.

పరిస్థితి విషమించడంతో బాధితుడు రహస్యంగా జూబ్లీహిల్స్ పోలీసులకు సమాచారం అందించాడు. సమాచారం అందుకున్న వెంటనే ఇన్‌స్పెక్టర్ డి.అశోక్, ఎస్సై కె.భవాని తమ బృందంతో కలిసి పబ్‌కు చేరుకున్నారు. బాధితుడి నుంచి వివరాలు సేకరించిన అనంతరం, యువకులను ఉద్దేశపూర్వకంగా ట్రాప్ చేసి అధిక బిల్లుల పేరుతో డబ్బులు లాగేందుకు పబ్ నిర్వాహకులు, ఆ యువతి కుమ్మక్కై వ్యవహరిస్తున్నట్లు నిర్ధారించారు. బాధితుడు ఇచ్చిన ఫిర్యాదు ఆధారంగా పోలీసులు చీటింగ్ కేసు నమోదు చేసి దర్యాప్తు ప్రారంభించారు. ఈ క్రమంలో పబ్ మేనేజర్‌ను అదుపులోకి తీసుకుని విచారణ చేపట్టారు.