ఈ క్రమంలో తమ సమస్యలపై మాట్లాడుకుని పరిష్కరించుకుందామని నిర్ణయించుకున్న వీరిద్దరూ, ఈ నెల 21వ తేదీ రాత్రి మాదాపూర్ సిద్దిక్ నగర్‌లోని ఓ హోటల్‌లో గదిని తీసుకుని చెక్ ఇన్ అయ్యారు. గదిలో ఉన్న సమయంలో.. ఇకపై కలిసి ఉందామని, వెంటనే తనను వివాహం చేసుకోవాలని నిఖిత ప్రియుడిని కోరింది. అయితే ఆమె ప్రతిపాదనను రవితేజ పూర్తిగా నిరాకరించడంతో ఇద్దరి మధ్య వాగ్వాదం మొదలైంది.

ఆ సమయంలో తీవ్ర మద్యపాన మత్తులో ఉన్న రవితేజ క్షణికావేశంలో నిఖితపై దాడికి దిగాడు. తీవ్ర ఆగ్రహంతో ఆమె తలను గదిలోని గోడకు బలంగా బాదడంతో ఆమె అక్కడికక్కడే తీవ్రంగా గాయపడి కుప్పకూలింది. అనంతరం ఏమీ తెలియనట్లు నటిస్తూ, అర్ధరాత్రి వేళ ఆమెకు ఆరోగ్యం బాగాలేదని చెప్పి హోటల్ సిబ్బంది సహకారంతో సమీప ఆసుపత్రికి తీసుకెళ్లాడు. అక్కడ వైద్యులు పరిశీలించి ఆమె అప్పటికే మృతి చెందినట్లు నిర్ధారించడంతో భయపడిన నిందితుడు అక్కడి నుంచి గుట్టుచప్పుడు కాకుండా పారిపోయాడు.

నగరం నుంచి తప్పించుకున్న రవితేజ మరుసటి రోజు ఉదయం విశాఖపట్నంలోని తన స్వస్థలానికి చేరుకున్నాడు. అక్కడ ఫ్లోర్ క్లీనింగ్ ద్రావణం తాగి ఆత్మహత్యకు యత్నించగా, కుటుంబసభ్యులు అతడిని గుర్తించి ఆసుపత్రిలో చేర్పించారు. అప్పటికే అనుమానాస్పద మృతిగా కేసు నమోదు చేసి దర్యాప్తు చేపట్టిన మాదాపూర్ పోలీసులకు నిందితుడు ఆసుపత్రిలో ఉన్న విషయం తెలిసింది. దీంతో ఆంధ్రప్రదేశ్ పోలీసుల సమన్వయంతో అతడిపై నిఘా ఉంచారు. సోమవారం ఆసుపత్రి నుంచి డిశ్చార్జ్ కాగానే స్థానిక న్యాయస్థానం నుంచి ట్రాన్సిట్ వారెంట్ పొంది హైదరాబాద్‌కు తీసుకొచ్చారు. విచారణలో నిందితుడు చేసిన నేరాన్ని అంగీకరించడంతో పోలీసులు అతడిపై హత్య కేసు నమోదు చేసి జైలుకు తరలించారు.