ఓయో గదిలో విగతజీవిగా పడివున్న యువతి పేరు దుర్గగా గుర్తించారు. ఆమె వికారాబాద్ జిల్లాకు చెందినట్లుగా రూమ్‌లో దొరికిన యువతి బ్యాగ్‌లోని ఆధార్ కార్డు, సర్టిఫికెట్ల ఆధారంగా తెలుసుకున్నారు పోలీసులు. అయితే మృతురాలు దుర్గ ఆమెతో వచ్చిన గణేష్ అనే ప్రియుడి పేరును, తన పేరును మార్చి చెప్పి రూమ్ రెంట్‌కి తీసుకున్నారు. సోమవారం ఓయో రూమ్‌ తీసుకున్న జంట తెల్లవారేసరికి యువతి బెడ్డుపై చనిపోయి కనిపించింది. టిఫిన్ ఇచ్చేందుకు వెళ్లిన ఓయో సిబ్బందికి డోర్‌ ఓపెన్ కాకపోవడంతో పోలీసులకు సమాచారం అందించారు. పోలీసుల సమక్షంలో తలుపులు తెరిచి చూడగానే యువతి మృతదేహం కనిపించింది. అనుమానాస్పదమృతిగా కేసు నమోదు చేసుకున్న పోలీసులు యువతి బ్యాగ్‌లో ఆధార్, సర్టిఫికెట్లను పరిశీలించారు. మృతురాలి పేరు ఓయో రికార్డులో చూపినట్లుగా శిరీష కాదని అసలు పేరు దుర్గ అని తేల్చారు. అంతే కాదు ఆమె వెంట వచ్చిన గణేష్ అసలు పేరు శ్రీనివాస్‌గా గుర్తించారు.

దుర్గ చనిపోయిన తర్వాత శ్రీనివాస్ పరారీలో ఉండటంతో పోలీసులు అతడినే అనుమానిస్తున్నారు. దీంతో పాటు రూమ్‌లో మద్యం బాటిల్లు కూడా లభించడంతో మద్యం తాగి ఆమెను గొంతు నులిమి హత్య చేసినట్లు అనుమానిస్తున్నారు. యువతితో ఓయో రూమ్‌కి వచ్చిన వ్యక్తి శ్రీనివాస్ మినీ బ్యాంకులో యువతికి పరిచయమైనట్లుగా భావిస్తున్నారు. మృతురాలు వికారాబాద్ వాసిగా తేలడంతో మరిన్ని వివరాలు రాబడుతున్నారు.ఓయో రూమ్‌లో అమర్చిన సీసీ ఫుటేజ్ ఆధారంగా నిందితుడ్ని గుర్తించి.. అతడి కోసం గాలింపు చర్యలు చేపట్టారు. సరిగ్గా వారం రోజుల క్రితం మాదాపూర్‌ ఓయో రూమ్‌లో విశాఖకు చెందిన నిఖిత అనే యువతి కూడా ఇదే తరహాలో రూమ్‌లో శవమై కనిపించింది. ఆమెతో పాటు వచ్చిన ప్రియుడు పరార్ అవడం, మృతురాలి శరీరంపై గాయాలుండటంతో ఆకేసులో కూడా ప్రియుడ్నే పోలీసులు అనుమానించి గాలింపు చర్యలు చేపట్టారు.