లీగ్ దశ చివరి పోరులో చిరకాల ప్రత్యర్థి పాకిస్థాన్‌పై ఉత్కంఠ విజయం సాధించి రెండో దశకు అర్హత సాధించిన హర్మన్‌ప్రీత్ సేన, నేడు జరిగే పూల్-ఈ సమరంలో పటిష్టమైన ఒలింపిక్ ఛాంపియన్ నెదర్లాండ్స్‌తో తలపడనుంది. భారత కాలమానం ప్రకారం శనివారం రాత్రి 7:30 గంటలకు ఈ హై-వోల్టేజ్ మ్యాచ్ ప్రారంభం కానుంది. సెమీఫైనల్ బెర్తును దక్కించుకోవాలంటే నెదర్లాండ్స్‌పై భారత్ తప్పక విజయం సాధించాల్సిన పరిస్థితి నెలకొనడంతో ఈ పోరు ఇరు జట్లకూ చావోరేవోగా మారింది.