న్యూస్ 18 హిందీ కథనం ప్రకారం.. బుధవారం అమెరికా రక్షణ శాఖ విడుదల చేసిన ప్రకటనలో, ప్రపంచంలోనే అత్యంత పురాతనమైన,  అతిపెద్ద యూనిఫైడ్ కాంబాట్ కమాండ్లలో ఒకటైన ఈ కమాండ్‌కు మళ్లీ పాత పేరును పునరుద్ధరిస్తున్నట్లు వెల్లడించింది. రెండో ప్రపంచ యుద్ధం అనంతరం ఆసియా-పసిఫిక్ ప్రాంత భద్రతా వ్యవస్థ రూపకల్పనలో ఈ కమాండ్ కీలక పాత్ర పోషించిందని పేర్కొంది. అందుకే 1947 నుంచి కొనసాగిన చారిత్రక గుర్తింపును తిరిగి తీసుకురావాలని నిర్ణయించినట్లు వివరించింది.

ఈ పేరు మార్పు నేపథ్యంలో అంతర్జాతీయ వ్యూహాత్మక వర్గాల్లో పలు చర్చలు మొదలయ్యాయి. ముఖ్యంగా 2018లో అప్పటి అధ్యక్షుడు డొనాల్డ్ ట్రంప్ తొలి పదవీకాలంలో “పసిఫిక్ కమాండ్” పేరును “ఇండో-పసిఫిక్ కమాండ్”గా మార్చడం వెనుక భారతదేశానికి పెరుగుతున్న ప్రాధాన్యతను ప్రపంచానికి తెలియజేయాలనే ఉద్దేశం ఉందని అప్పట్లో భావించారు. ఇప్పుడు అదే పేరును తిరిగి మార్చడం వెనుక మరో రాజకీయ సందేశం ఉందా అనే ప్రశ్నలు తలెత్తుతున్నాయి.

ఇటీవలి కాలంలో ఇరాన్ యుద్ధం అనంతరం అమెరికా-పాకిస్థాన్ సంబంధాలు మరింత దగ్గరయ్యాయనే విశ్లేషణల మధ్య ఈ నిర్ణయం రావడం వల్ల, పాకిస్థాన్‌ను సంతృప్తిపరచడానికే ఈ చర్య చేపట్టారా అనే అనుమానాలు వ్యక్తమవుతున్నాయి. అయితే అమెరికా రక్షణ శాఖ అలాంటి వ్యాఖ్యానాలను పూర్తిగా తోసిపుచ్చింది. పేరు మాత్రమే మారుతోందని, కమాండ్ బాధ్యతలు, కార్యకలాపాలు, వ్యూహాత్మక లక్ష్యాలు లేదా సైనిక విధానాల్లో ఎలాంటి మార్పు ఉండదని స్పష్టంగా ప్రకటించింది.

రక్షణ శాఖ వివరాల ప్రకారం, “పసిఫిక్ కమాండ్” అనే పేరు మొదటిసారిగా 1947 జనవరి 1 నుంచి అమల్లోకి వచ్చింది. దాదాపు ఏడు దశాబ్దాల పాటు అదే పేరుతో కొనసాగిన ఈ కమాండ్‌కు 2018లో “ఇండో-పసిఫిక్ కమాండ్”గా పేరు మార్చారు. ఆ సమయంలో అప్పటి రక్షణ మంత్రి జిమ్ మ్యాటిస్ మాట్లాడుతూ, హిందూ మహాసముద్రం మరియు పసిఫిక్ మహాసముద్ర ప్రాంతాలు పరస్పరం మరింత అనుసంధానమయ్యాయని, ఈ ప్రాంత భద్రతా వ్యవస్థలో భారత్ కీలక భాగస్వామిగా ఎదిగిందని చెప్పారు. అందుకే కమాండ్ పేరులో “ఇండో” అనే పదాన్ని చేర్చినట్లు వెల్లడించారు.

అమెరికా, భారత్, జపాన్, ఆస్ట్రేలియా వంటి దేశాల మధ్య వ్యూహాత్మక సహకారం పెరుగుతున్న సమయంలో జరిగిన ఆ మార్పు ప్రపంచవ్యాప్తంగా ప్రాధాన్యం సంతరించుకుంది. ఇప్పుడు మళ్లీ పాత పేరును పునరుద్ధరించడం ద్వారా అమెరికా చారిత్రక వారసత్వానికి ప్రాధాన్యం ఇస్తోందని అధికారిక వర్గాలు చెబుతున్నప్పటికీ, దీనిపై భౌగోళిక-రాజకీయ చర్చలు కొనసాగుతున్నాయి.

అయితే అమెరికా ప్రభుత్వం మాత్రం ఒక విషయాన్ని స్పష్టంగా చెబుతోంది. పేరు మారినా కమాండ్ పరిధి, బాధ్యతలు, సైనిక వ్యూహం లేదా ఇండో-పసిఫిక్ ప్రాంతంపై అమెరికా దృష్టిలో ఎలాంటి మార్పు ఉండదని, ఇది పూర్తిగా ప్రతీకాత్మక నిర్ణయమేనని పేర్కొంటోంది.