ఇరాన్ తన అణు కార్యక్రమం విషయంలో కట్టుబడి ఉండేలా ఒప్పించే ప్రయత్నాల్లో భాగంగా, టెహ్రాన్‌కు ఆర్థిక ఉపశమనం కల్పించేందుకు వాషింగ్టన్ సిద్ధమైందని ఆక్సియోస్ తన కథనంలో పేర్కొంది. ఖతార్, పాకిస్తాన్ దేశాల మధ్యవర్తిత్వంతో సాగుతున్న పరోక్ష దౌత్య చర్యల్లో భాగంగా ఈ ప్రతిపాదన తెరపైకి వచ్చిందని గుర్తుతెలియని అమెరికా అధికారులను ఉటంకిస్తూ నివేదించింది. అయితే ట్రంప్ ఈ వార్తలను పూర్తిగా తోసిపుచ్చారు.

ప్రపంచ ముడిచమురు, ద్రవీకృత సహజవాయువు (LNG) రవాణాలో ఐదో వంతు వాటా కలిగిన కీలకమైన ‘హోర్ముజ్ జలసంధి’ మూసివేత వివాదం కొనసాగుతున్న తరుణంలోనే ట్రంప్ ఈ ప్రకటన చేశారు. శనివారం నాడే హోర్ముజ్ జలసంధిని తిరిగి తెరవడంపై ఇరాన్ చేసిన ప్రతిపాదనను ట్రంప్ తిరస్కరించారు. అమెరికా నావికా దిగ్బంధనాన్ని ఎత్తివేయడం, ఆంక్షల సడలింపు, స్తంభింపజేసిన ఆస్తుల విడుదలతో కూడిన షరతులను ఇరాన్ విధించినట్లు సమాచారం. ఈ ప్రాంతంలో నెలకొన్న ఉద్రిక్తతల కారణంగా అంతర్జాతీయ ఇంధన మార్కెట్లు, షిప్పింగ్ రంగం తీవ్రంగా ప్రభావితమవుతున్నాయి. యుద్ధ ప్రభావంతో అమెరికాలో గ్యాస్ సహా పలు వస్తువుల ధరలు గణనీయంగా పెరిగినట్లు ఏఎఫ్‌పీ (AFP) తెలిపింది.