తాజాగా ఓ సినిమా వేడుకలో పాల్గొన్న మెగాస్టార్, తన అభిమానులకు ‘కాకా’ అప్‌డేట్స్ ఇచ్చి ఉత్సాహం నింపారు. ‘సిగ్మా’ సినిమా ప్రీ రిలీజ్ ఈవెంట్‌కు ముఖ్య అతిథిగా హాజరైన చిరంజీవి మాట్లాడుతూ.. “సినిమా ఫస్టాఫ్ షూటింగ్ ఇప్పటికే పూర్తయింది. సెకండ్ హాఫ్ కూడా 30 శాతం వరకు కంప్లీట్ చేశాం. సంగీత దర్శకుడు తమన్ ఫస్ట్ హాఫ్‌కు సంబంధించిన బ్యాక్‌గ్రౌండ్ మ్యూజిక్ పనుల్లో ఫుల్ బిజీగా ఉన్నాడు. కచ్చితంగా ఈ సంక్రాంతికి మేము థియేటర్లలోకి వస్తున్నాం. ఈ పండగ మనదే” అని ధీమా వ్యక్తం చేశారు. దీంతో జనవరి 13న ‘కాకా’ థియేటర్లలో గర్జించడం ఖాయమని స్పష్టమైంది.

అటు షూటింగ్ శరవేగంగా జరుపుతూనే, మరోవైపు పోస్ట్ ప్రొడక్షన్, డబ్బింగ్ పనులను సైతం ఏకకాలంలో పూర్తి చేస్తోంది చిత్రబృందం. ఈ సినిమాలో చిరు సరసన యువ హీరోయిన్లు అనస్వర రాజన్, నివేదా పేతురాజ్ కీలక పాత్రల్లో నటిస్తున్నారు.

ఈసారి సంక్రాంతి బరిలో కేవలం మెగాస్టార్ మాత్రమే కాదు, బాక్సాఫీస్ వద్ద రికార్డులు సృష్టించేందుకు మరికొన్ని భారీ క్రేజీ ప్రాజెక్టులు కూడా క్యూ కట్టాయి. పండుగకు సినిమాలను విడుదల చేసి బ్లాక్‌బస్టర్ హిట్స్ కొట్టడం దర్శకుడు అనిల్ రావిపూడికి సెంటిమెంట్. అదే సెంటిమెంట్‌ను కంటిన్యూ చేస్తూ విక్టరీ వెంకటేష్, నందమూరి కల్యాణ్ రామ్ హీరోలుగా ఓ మల్టీస్టారర్ చిత్రాన్ని ఆయన తెరకెక్కిస్తున్నారు. కీర్తి సురేశ్, కృతి శెట్టి కథానాయికలుగా నటిస్తున్న ఈ సినిమాకు ‘జనవరి 12న విడుదల’ అనే ఆసక్తికరమైన టైటిల్ ఫిక్స్ చేశారు. పేరుకు తగ్గట్లే జనవరి 12న ఈ చిత్రం థియేటర్లలోకి రానుంది. మరోవైపు సూపర్ స్టార్ రజనీకాంత్ నటిస్తున్న పాన్ ఇండియా మూవీ ‘ధర్మన్’ కూడా సంక్రాంతి బరిలోనే నిలవనున్నట్లు మేకర్స్ అధికారికంగా ప్రకటించారు.

అగ్ర హీరోల చిత్రాలతో పాటు యువ హీరోలు సైతం తమ అదృష్టాన్ని పరీక్షించుకోనున్నారు. సంక్రాంతికి ఫ్యామిలీ ఆడియన్స్‌ను టార్గెట్ చేసి హిట్స్ కొట్టే శర్వానంద్ ఈసారి ‘జార్జ్ క్రిష్’ అనే సినిమాతో రాబోతున్నాడు. అలాగే సుప్రీమ్ హీరో సాయిదుర్గా తేజ్ నటిస్తున్న పక్కా రూరల్ డ్రామా ‘సంబరాల ఏటి గట్టు’, శ్రియారెడ్డి, అక్షయ్ ఖన్నా కీలక పాత్రల్లో తెరకెక్కుతున్న ‘మహాకాళి’ చిత్రాలు కూడా పండుగ రేసులో నిలబడనున్నాయి. మొత్తానికి రాబోయే సంక్రాంతి పండుగ సినీ అభిమానులకు ఒక కన్నుల పండుగ లాంటి బాక్సాఫీస్ సమరాన్ని అందించడం ఖాయంగా కనిపిస్తోంది.