అయితే, ముంబై విసిరిన చిన్న టార్గెట్‌ను ఛేదించే క్రమంలో KKR ఇన్నింగ్స్ ఆరంభంలోనే భారీ షాక్‌లు తగిలాయి. ముంబై బౌలర్లు లైన్ అండ్ లెంగ్త్‌తో విరుచుకుపడటంతో కేవలం 54 పరుగులకే 3 కీలక వికెట్లు కోల్పోయి నైట్ రైడర్స్ పీకల్లోతు కష్టాల్లో పడింది. ఓపెనర్లు, టాప్ ఆర్డర్ బ్యాటర్లు చేతులెత్తేయడంతో ఈడెన్ గార్డెన్స్‌లో ఒక్కసారిగా నిశ్శబ్దం ఆవరించింది.

ముఖ్యంగా భారీ ఇన్నింగ్స్ ఆడుతారనుకున్న సీనియర్ బ్యాటర్ అజింక్యా రహానే (21) క్రీజులో సెట్ అయినట్లే కనిపించి పెవిలియన్ చేరగా, అలెన్ (8), గ్రీన్ (4) ఘోరంగా విఫలమయ్యారు. ముంబై బౌలర్లు మ్యాచ్‌పై పట్టు బిగిస్తున్న తరుణంలో KKRని గట్టెక్కించే బాధ్యతను మిడిలార్డర్ భుజానెత్తుకుంది.

ఈ దశలో క్రీజులోకి వచ్చిన మన ‘లోకల్ బాయ్’ మనీశ్ పాండే, పవర్‌ఫుల్ హిట్టర్ రోవ్‌మన్ పావెల్ ముంబై బౌలర్లపై ఎదురుదాడికి దిగారు. ముంబై బౌలింగ్ అటాక్‌ను సమర్థవంతంగా ఎదుర్కొంటూ మనీశ్ పాండే (45) క్లాస్ ఇన్నింగ్స్‌తో అలరించగా, పావెల్ (40) తన మార్క్ భారీ షాట్లతో స్కోరు బోర్డును పరుగులు పెట్టించాడు. వీరిద్దరూ నాలుగో వికెట్‌కు అద్భుత భాగస్వామ్యాన్ని నెలకొల్పడంతో, ఒకానొక దశలో కష్టాల్లో పడిన కోల్‌కతా.. ఆ తర్వాత సునాయాసంగా, గంభీరంగా టార్గెట్‌ను రీచ్ అయిపోయింది.

టాస్ ఓడి తొలుత బ్యాటింగ్‌కు దిగిన ముంబయి ఇండియన్స్‌కు ఆరంభంలోనే కోలుకోలేని దెబ్బలు తగిలాయి. హిట్‌మ్యాన్ రోహిత్ శర్మ (15) కొద్దిసేపు క్రీజులో నిలదొక్కుకునే ప్రయత్నం చేసినా పెద్ద ఇన్నింగ్స్ ఆడలేకపోయాడు. మరో ఓపెనర్ రికెల్టన్ (6) కూడా సింగిల్ డిజిట్‌కే పెవిలియన్ చేరడంతో పవర్‌ప్లే ముగిసేలోపే ముంబయి కీలక వికెట్లు కోల్పోయి ఒత్తిడిలో పడింది.

మిడిలార్డర్ కూడా ఆశించిన స్థాయిలో రాణించలేదు. మిస్టర్ 360 సూర్యకుమార్ యాదవ్ (15) ఈసారి ప్రభావం చూపలేకపోయాడు. యువ ఆటగాడు తిలక్ వర్మ (20) కొద్దిసేపు ప్రతిఘటించినా ఇన్నింగ్స్‌ను నిలబెట్టలేకపోయాడు. నమన్ ధీర్ (0) డకౌట్‌గా వెనుదిరగగా, విల్ జాక్స్ (14) కూడా నిరాశపరిచాడు. కెప్టెన్ హార్దిక్ పాండ్యా (26) క్రీజులో ఉన్నంతసేపు ఆశలు కలిగించినా, కేకేఆర్ స్పిన్ దాడికి చిక్కి అవుట్ అయ్యాడు. 110 పరుగులకే 7 వికెట్లు కోల్పోయి ముంబయి పూర్తిగా కష్టాల్లో పడిన దశలో, టెయిల్ ఎండర్ ‘బాష్’ అద్భుతంగా బ్యాట్ ఝులిపించాడు. కేవలం 18 బంతుల్లో 32 పరుగులు చేసి ఇన్నింగ్స్‌కు ఊపిరి పోసి, సిక్సర్లతో స్కోరును ముందుకు నడిపాడు. చివరికి ముంబయి 147 పరుగుల గౌరవప్రదమైన స్కోరును నమోదు చేసింది.