లక్నో ఇన్నింగ్స్‌కు ఓపెనర్లు మిచెల్ మార్ష్, జోస్ ఇంగ్లిస్ సూపర్ స్టార్ట్ అందించారు. మొదటి నుంచే అటాకింగ్ మోడ్‌లో ఆడిన ఈ జోడీ.. రాజస్థాన్ బౌలర్లను పూర్తిగా ఒత్తిడిలోకి నెట్టింది. కేవలం 50 బంతుల్లోనే తొలి వికెట్‌కు 109 పరుగుల భాగస్వామ్యం నమోదు చేసి మ్యాచ్‌పై ఎల్ఎస్‌జీ పట్టు బిగించారు. మార్ష్ అయితే పూర్తి స్థాయిలో విధ్వంసం సృష్టించాడు. 57 బంతుల్లో 11 ఫోర్లు, 5 భారీ సిక్సర్లతో 96 పరుగులు చేసి సెంచరీకి కేవలం నాలుగు పరుగుల దూరంలో ఆగిపోయాడు. మరోవైపు జోస్ ఇంగ్లిస్ కూడా 29 బంతుల్లో 60 పరుగులు చేసి పవర్‌ప్లేలోనే మ్యాచ్ మోమెంటమ్‌ను లక్నో వైపు తిప్పేశాడు.

మిడిల్ ఓవర్లలో నికోలస్ పూరన్ (16), ఆయుష్ బదోని (0) పెద్దగా ప్రభావం చూపలేకపోయినా.. కెప్టెన్ రిషబ్ పంత్ చివర్లో వేగంగా ఆడాడు. 23 బంతుల్లో 35 పరుగులు చేసిన పంత్.. రెండు ఫోర్లు, రెండు సిక్సర్లతో స్కోర్‌ను 220 దాటించడంలో కీలక పాత్ర పోషించాడు. అయితే చివరి ఓవర్లో జోఫ్రా ఆర్చర్ బౌలింగ్‌లో వరుసగా జరిగిన రనౌట్లు ఎల్ఎస్‌జీకి షాక్ ఇచ్చాయి. ముందుగా సెంచరీ దిశగా దూసుకెళ్తున్న మార్ష్ రనౌట్ కాగా, వెంటనే పంత్ కూడా పెవిలియన్ చేరాడు. దీంతో మార్ష్ అద్భుత సెంచరీ చేసే అవకాశాన్ని తృటిలో కోల్పోయాడు.

రాజస్థాన్ బౌలర్లలో యశ్ రాజు పుంజా రెండు వికెట్లు పడగొట్టగా, జోఫ్రా ఆర్చర్ ఒక వికెట్ సాధించాడు. అయితే మిగతా బౌలర్లు భారీగా పరుగులు సమర్పించుకోవడంతో రాజస్థాన్ ఇప్పుడు బ్యాటర్లపై పూర్తిగా ఆధారపడాల్సిన పరిస్థితి వచ్చింది. 221 పరుగుల లక్ష్యంతో బరిలోకి దిగనున్న రాజస్థాన్ రాయల్స్.. ఈ ఛేదన పూర్తి చేసి ప్లేఆఫ్ ఆశలను సజీవంగా ఉంచుకుంటుందా లేదా అనేది ఆసక్తికరంగా మారింది.