మయూఖ (పాయల్ చెంగప్ప) ఒక సాధారణ బ్యాంక్ ఉద్యోగిని. రాత్రి వేళల్లో తన అపార్ట్‌మెంట్‌లో ఎవరో గుర్తుతెలియని వ్యక్తి తనను వెంబడిస్తున్నట్లు, భయపెడుతున్నట్లు అనిపించడంతో ఆమె ప్రాణభయంతో మరో అపార్ట్‌మెంట్‌కు మారుతుంది. సరిగ్గా అదే సమయంలో నగరంలో ఒక సైకో కిల్లర్ మహిళలను టార్గెట్ చేసి కిడ్నాప్ చేయడం, వారి శరీర భాగాలను కిరాతకంగా నరికి చంపడం కలకలం రేపుతుంది. ఆ సైకోకు ఒక విచిత్రమైన జబ్బు ఉంటుంది. అతనికి సాధారణ వాసనలు ఏవీ తెలియవు, కేవలం రక్తం వాసన మాత్రమే తెలుస్తుంది. ఆ రక్తంతోనే ఒక ప్రత్యేకమైన పర్ఫ్యూమ్ తయారు చేస్తుంటాడు. మరి నగరంలో జరుగుతున్న ఈ వరుస హత్యలకు, మయూఖకు ఉన్న సంబంధం ఏమిటి? తనను వెంటాడుతున్న వ్యక్తి, ఈ సైకో కిల్లర్ ఒక్కరేనా? ఈ క్రైమ్ మిస్టరీని పోలీసులు ఎలా ఛేదించారు అనేది తెలియాలంటే సినిమా చూడాల్సిందే.

దర్శకుడు శ్రీ తేజ్ ఎస్.కె. కథను ప్రారంభించిన విధానం బాగున్నప్పటికీ, స్క్రీన్‌ప్లేలో కొన్ని ఒడిదుడుకులు కనిపిస్తాయి. ఫస్టాఫ్ లో బ్యాంకు కస్టమర్ల చుట్టూ, అపార్ట్‌మెంట్ వాచ్‌మెన్ చుట్టూ తిరిగే సన్నివేశాలు కొద్దిగా రిపీటెడ్‌గా అనిపిస్తాయి. అయితే, కథలో వచ్చే ప్రతి పాత్రపై అనుమానం కలిగించేలా దర్శకుడు సస్పెన్స్ మెయింటైన్ చేసిన తీరు మెప్పిస్తుంది. సెకండాఫ్‌లో రివీల్ అయ్యే సైకో ఫ్లాష్ బ్యాక్, అతనికి సమాజంలో ఉన్నత హోదా ఎలా దక్కిందనే విషయాల్లో సినిమాటిక్ లిబర్టీస్ ఎక్కువై లాజిక్ మిస్ అయినట్లు స్పష్టంగా తెలుస్తుంది. అయినప్పటికీ, తక్కువ నిడివితో సినిమాను పరుగులు పెట్టించడం, క్లైమాక్స్‌లో హీరోయిన్ స్వయంగా సైకోను మట్టుబెట్టడం, పార్ట్-2కి లీడ్ ఇవ్వడం ఆసక్తికరంగా ఉన్నాయి.