ఈ సినిమా ప్రధానంగా 1756, 1962.. రెండు భిన్నమైన కాలఖండాల్లో సాగుతుంది. హిమాలయాల్లోని ఓ రహస్య భైరాగి, రంగనాథస్వామి నాభిలోని బ్రహ్మకమలం, నాగబంధం అనే పురాతన పుస్తకం చుట్టూ ఈ కథను అల్లారు. ఆర్కియాలజీ స్పెషలిస్ట్ ప్రభాకర్ (జగపతిబాబు), విలన్ అలీ (రిషభ్ సావ్నీ) ఆ అరుదైన పుస్తకం, బ్రహ్మకమలం కోసం ముమ్మరంగా వెతుకుతుంటారు. శ్రీరంగపురంలోని రంగనాథస్వామి ఆలయంలో ఉండే ఆ బ్రహ్మకమలాన్ని చేజిక్కించుకునే క్రమంలో హీరో రుద్ర (విరాట్ కర్ణ) ఎలా ఎంటర్ అయ్యాడు? ఓ అనాథ అయిన రుద్ర, తన పెంపుడు చెల్లి మానస (సోనియా సింగ్) పెళ్లి ఖర్చుల కోసం డబ్బు ఆశతో ఈ మిస్టరీలోకి అడుగుపెడతాడు. అసలు ఆ బ్రహ్మకమలంతో వాళ్లకు ఉన్న పనేంటి? ఆలయ అర్చకురాలి శిష్యురాలిగా ఉన్న పార్వతి (నభా నటేష్) నేపథ్యం ఏంటి? అనేది తెరపై చూడాల్సిందే.

సినిమా ప్రారంభం నుంచే అనంత పద్మనాభ స్వామి ఆలయంను తలపించే నేపథ్యం, భారీ సెట్స్, విజువల్స్ ప్రేక్షకులను అబ్బురపరుస్తాయి. ఆర్ట్ డిపార్ట్‌మెంట్ పనితీరు, సినిమాటోగ్రఫీ ఈ సినిమాకు ప్రధాన బలం. సెకండాఫ్‌లో వచ్చే 1756 నాటి ఎపిసోడ్స్, క్లైమాక్స్ యాక్షన్, డివోషనల్ ఎలివేషన్స్ ప్రేక్షకులకు మంచి థియేట్రికల్ అనుభూతిని ఇస్తాయి. ఏఐ (AI) టెక్నాలజీని ఉపయోగించి గ్రాఫిక్స్, శివుడిని రూపొందించడం మరో ఆకర్షణ. బ్రహ్మ కమలం చుట్టూ తిరిగే ట్విస్టులు సెకండాఫ్‌ను నిలబెట్టాయి.

రుద్ర, నాగసాధువు అనే రెండు వేరియేషన్స్ ఉన్న పాత్రలో విరాట్ కర్ణ తన నటనతో, కష్టంతో ఆకట్టుకున్నాడు. బాలీవుడ్ నటుడు రిషభ్ సావ్నీ నెగిటివ్ రోల్‌లో, ముస్లిం రాజుగా అదరగొట్టాడు. ఈ చిత్రంతో అతనికి టాలీవుడ్‌లో మరిన్ని అవకాశాలు రావడం ఖాయం. డ్యూయల్ రోల్‌లో నభా నటేష్ సాంప్రదాయంగా కనిపిస్తూనే గ్లామర్ ఒలకబోసింది. యూట్యూబ్ స్టార్ సోనియా సింగ్‌కు మంచి చెల్లి పాత్ర దక్కింది. అనసూయ, అంకిత్ కొయ్య, మురళీ శర్మ, ఐశ్వర్య మీనన్ తమ పరిధి మేర నటించి మెప్పించారు.