2025 డిసెంబర్ 19న ప్రపంచవ్యాప్తంగా థియేటర్లలో విడుదలైన ఈ చిత్రం బాక్సాఫీస్ వద్ద అద్భుత విజయాన్ని సాధించింది. ప్రపంచవ్యాప్తంగా సుమారు 1.49 బిలియన్ డాలర్లకు పైగా వసూళ్లు సాధించి మరోసారి జేమ్స్ కామెరూన్ సత్తా చాటింది.

ఇప్పుడు థియేటర్లలో సంచలనం సృష్టించిన ఈ విజువల్ వండర్ ఓటీటీ వేదికగా ప్రేక్షకుల ముందుకు వచ్చింది. భారతదేశంలో ఈ చిత్రం జియోహాట్‌స్టార్ వేదికగా జూన్ 24 నుంచి స్ట్రీమింగ్ అవుతోంది. ప్రపంచవ్యాప్తంగా డిస్నీ+లో విడుదల కాగా, భారత ప్రేక్షకులు జియోహాట్‌స్టార్‌లో ఈ చిత్రాన్ని వీక్షించవచ్చు.

‘అవతార్: ఫైర్ అండ్ యాష్’ కథ పండోరా గ్రహంలోనే కొనసాగుతుంది. జేక్ సల్లీ, నెయ్తిరి కుటుంబం ఎదుర్కొనే కొత్త సవాళ్లు ఈ చిత్రానికి ప్రధాన ఆకర్షణ. గత భాగంలో జరిగిన విషాద ఘటనల తర్వాత వారి కుటుంబం భావోద్వేగంగా తీవ్ర కష్టాలను ఎదుర్కొంటుంది. ఇదే సమయంలో పండోరాలో కొత్తగా పరిచయమయ్యే ‘ఆష్ పీపుల్’ అనే తెగ కథను మరింత ఆసక్తికరంగా మారుస్తుంది. ఈ తెగ నాయకురాలు వరాంగ్ రూపంలో కొత్త ప్రమాదం ఎదురవుతుంది.

జేమ్స్ కామెరూన్ సినిమాలంటే ముందుగా గుర్తుకు వచ్చేది అద్భుతమైన విజువల్ ఎఫెక్ట్స్. ‘ఫైర్ అండ్ యాష్’లో కూడా అదే స్థాయిలో గ్రాఫిక్స్, విజువల్ టెక్నాలజీని ఉపయోగించారు. అగ్నిపర్వతాల మధ్య సాగే యుద్ధ సన్నివేశాలు, పండోరాలోని కొత్త ప్రాంతాలు, కొత్త జీవరాశులు ప్రేక్షకులను మంత్ర ముగ్ధులను చేస్తున్నాయి. థియేటర్లలో చూసినవారు ఇది ఒక విజువల్ ఫీస్ట్ అని ప్రశంసించగా, ఇప్పుడు ఓటీటీలో కూడా భారీ స్పందన లభిస్తోంది.

ఈ సినిమా ఇంగ్లీష్‌తో పాటు తెలుగు, హిందీ, తమిళం, మలయాళం, కన్నడ భాషల్లో కూడా అందుబాటులో ఉండటంతో భారతీయ ప్రేక్షకులు తమకు ఇష్టమైన భాషలో వీక్షించే అవకాశం పొందుతున్నారు. అవతార్ ఫ్రాంచైజీ అభిమానులు ఎప్పటినుంచో ఈ సినిమా డిజిటల్ రిలీజ్ కోసం ఎదురుచూస్తున్నారు. దాదాపు ఆరు నెలల థియేట్రికల్ రన్ తర్వాత ఓటీటీలోకి రావడంతో ఇప్పుడు ఇంట్లోనే పండోరా ప్రపంచాన్ని ఆస్వాదించే అవకాశం లభించింది.

‘అవతార్: ఫైర్ అండ్ యాష్’ ఓటీటీ ఎంట్రీతో మరోసారి సోషల్ మీడియాలో ట్రెండింగ్‌గా మారింది. విజువల్స్, ఎమోషన్స్, యాక్షన్‌తో నిండిన ఈ చిత్రం వీకెండ్‌లో తప్పక చూడాల్సిన సినిమాల జాబితాలో చేరిపోయింది.