Last Updated:
యునైటెడ్ స్టేట్స్ జియోలాజికల్ సర్వే (USGS) నివేదిక ప్రకారం.. కారకస్కు పశ్చిమంగా సుమారు 160 కిలోమీటర్ల (100 మైళ్లు) దూరంలో రిక్టర్ స్కేలుపై 7.2 తీవ్రతతో మొదటి భూకంపం సంభవించింది. ఈ భూకంపాల వల్ల భారీ ప్రాణ, ఆస్తి నష్టం ఉంటుందని యునైటెడ్ స్టేట్స్ జియోలాజికల్ సర్వే పేర్కొంది.
Venezuela Earthquake: దక్షిణ అమెరికా దేశమైన వెనెజులాలో బుధవారం సాయంత్రం సంభవించిన వరుస భారీ భూకంపాలు తీవ్ర విధ్వంసాన్ని సృష్టించాయి. రాజధాని కారకస్కు పశ్చిమంగా సంభవించిన ఈ ప్రకంపనల ధాటికి పలు భవనాలు కుప్పకూలాయి. అనేకమంది ప్రజలు శిథిలాల కింద చిక్కుకుపోవడంతో భారీగా ప్రాణనష్టం మరియు దేశవ్యాప్తంగా విస్తృత నష్టం సంభవించవచ్చని శాస్త్రవేత్తలు హెచ్చరిస్తున్నారు.
యునైటెడ్ స్టేట్స్ జియోలాజికల్ సర్వే (USGS) నివేదిక ప్రకారం.. కారకస్కు పశ్చిమంగా సుమారు 160 కిలోమీటర్ల (100 మైళ్లు) దూరంలో రిక్టర్ స్కేలుపై 7.2 తీవ్రతతో మొదటి భూకంపం సంభవించింది. ఇది సంభవించిన కేవలం ఒక్క నిమిషం లోపే, అంతకంటే అత్యంత శక్తివంతమైన 7.5 తీవ్రతతో రెండోసారి భూమి కంపించింది. “ఈ ప్రకృతి విపత్తు కారణంగా భారీ ప్రాణనష్టం, విస్తృత ఆస్తి నష్టం జరిగే అవకాశం ఉంది” అని పేర్కొన్న USGS.. ప్రాథమిక అంచనాల ప్రకారం మరణాల సంఖ్య 10,000 నుండి 1,00,000 వరకు ఉండవచ్చని తెలిపింది.
అధికారికంగా దేశవ్యాప్త మరణాల సంఖ్యను ప్రభుత్వం ఇంకా ప్రకటించనప్పటికీ, స్థానిక అధికారులు మరియు ప్రత్యక్ష సాక్షులు భవనాలు కూలిపోవడం, గాయపడిన వారి సంఖ్య వేగంగా పెరుగుతోందని నివేదించారు.
వెనెజులా అంతర్గత వ్యవహారాల మంత్రి డియోస్డాడో కాబెల్లో ప్రభుత్వ టెలివిజన్ ద్వారా మాట్లాడుతూ.. “అనేక భవనాలు, ఇళ్లు కూలిపోయాయి. అందుబాటులో ఉన్న భద్రతా, పౌర సహాయక సిబ్బందితో సహాయక చర్యలు చేపట్టాం. ఫైర్ డిపార్ట్మెంట్, పోలీసు బలగాలను పూర్తిగా రంగంలోకి దించాం” అని ప్రకటించారు. రాత్రి వేళల్లో కూడా అత్యవసర సిబ్బంది లైట్ల వెలుతురులో శిథిలాలను తొలగిస్తూ లోపల చిక్కుకున్న వారిని రక్షించేందుకు శ్రమిస్తున్నారు.
తూర్పు కారకస్ మునిసిపాలిటీ అయిన చాకో (Chacao) మేయర్ గుస్తావో దుక్యూ మాట్లాడుతూ.. తమ పరిధిలో రెండు భవనాలు కూలిపోయాయని, 16 మంది గాయపడ్డారని, కొందరు మరణించారని తెలిపారు. అయితే మరణాల ఖచ్చితమైన సంఖ్యను ఆయన పేర్కొనలేదు.
కారకస్ వీధుల్లో ఫైర్ ఇంజన్లు మోహరించాయి. అక్కడి ‘హాస్పిటల్ డి క్లినికాస్’ లో గాయపడిన వారికి చికిత్స అందించడానికి నైట్ షిఫ్ట్ సిబ్బందిని రెట్టింపు కావాలని కోరారు. తీరప్రాంత నగరమైన ‘లా గురైరా’ లో కూడా భవనాలు కూలిపోయినట్లు నివేదికలు వచ్చాయి. నష్టం తీవ్రత దృష్ట్యా కొన్ని మునిసిపాలిటీలు సోమవారం వరకు పాఠశాలలు, స్థానిక కార్యక్రమాలను రద్దు చేశాయి.
భూకంపం సంభవించిన వెంటనే యూఎస్ సునామీ హెచ్చరికల కేంద్రం ప్యూర్టో రికో, వర్జిన్ ఐలాండ్స్, అరుబా, కురాకో ప్రాంతాలకు జారీ చేసిన సునామీ హెచ్చరికలను సుమారు గంట తర్వాత ఉపసంహరించుకుంది. వెనెజులా దేశం కరేబియన్ ప్లేట్, సౌత్ అమెరికన్ ప్లేట్ కలిసే అత్యంత క్రియాశీలక భూకంప జోన్లో ఉంది. గతంలో 1812లో సంభవించిన ఘోర భూకంపంలో ఇక్కడ సుమారు 30,000 మంది మరణించారు.
Click here to add News18 as your preferred news source on Google. బ్రేకింగ్ న్యూస్, రాజకీయాలు, దేశంలోని అన్ని రాష్ట్రాల్లోని ముఖ్యమైన వార్తలు, విశ్లేషణ, కేంద్ర ప్రభుత్వ పథకాలకు సంబంధించిన స్టోరీలను న్యూస్18 తెలుగు నేషనల్ కేటగిరీలో చదవండి. మరిన్ని వార్తల కోసం న్యూస్ 18 తెలుగు ఫాలో అవండి.
Hyderabad,Telangana
