నరేంద్ర మోదీ 2014లో బాధ్యతలు చేపట్టే నాటికి భారత ఆర్థిక వ్యవస్థ రూపురేఖలు మారాయి. ఐటీ రంగం, సేవా రంగాలు విస్తరించాయి. ఈ తరుణంలో మోదీ వ్యాపారవేత్తలను, నవకల్పనలను దేశాభివృద్ధికి కేంద్రబిందువుగా మార్చారు. ఇందులో భాగంగా 2016లో ‘స్టార్టప్ ఇండియా’ పథకాన్ని ప్రారంభించారు. ప్రభుత్వ ఉద్యోగమే పరమావధిగా భావించే యువత ఆలోచనలను మార్చి, వారిని సొంతంగా వ్యాపారాలు పెట్టేలా ప్రోత్సహించారు. నేడు దేశంలో యునికార్న్ స్టార్టప్‌ల సంఖ్య వంద దాటడం గమనార్హం.

పెద్ద పరిశ్రమలకే కాకుండా వీధి వ్యాపారులు, చేతివృత్తుల వారు, చిన్న దుకాణదారుల కోసం మోదీ ప్రభుత్వం ‘ప్రధాన మంత్రి ముద్రా యోజన’ ద్వారా పూచీకత్తు లేని రుణాలు అందించింది. దేశ ఆర్థిక వ్యవస్థకు స్థానిక మెకానిక్, దర్జీ కూడా సమానమైన కాంట్రిబ్యూటర్ అని చాటిచెప్పారు. దేశంలో కోట్ల మంది చిన్న వ్యాపారులు ఈ పథకం ద్వారా లబ్ధి పొంది స్వయం ఉపాధి సాధించారు.

డిజిటల్ ఇండియా, యూపీఐ వ్యవస్థల ద్వారా దేశంలో నగదు రహిత లావాదేవీలు ఊహించని స్థాయికి చేరాయి. చిన్న బండ్ల దగ్గర కూడా క్యూఆర్ కోడ్ స్కానర్లు దర్శనమిస్తున్నాయి. నెహ్రూ హయాంలో డ్యాములు, ఫ్యాక్టరీలతో ప్రగతిని కొలిస్తే, నేడు సామాన్యుడి చేతిలోని స్మార్ట్‌ఫోన్ డిజిటల్ లావాదేవీలతో దేశ ప్రగతి కనిపిస్తోంది. సాంకేతికత ద్వారా అనధికారిక ఆర్థిక వ్యవస్థ అధికారిక రూపంలోకి మారుతోంది.

ప్రభుత్వమే నేరుగా ఫ్యాక్టరీలను నడపకుండా, ప్రైవేటు పెట్టుబడులను ఆకర్షించేందుకు మోదీ ప్రభుత్వం ‘ఉత్పాదక అనుసంధానిత ప్రోత్సాహక’ (PLI) పథకాన్ని తెచ్చింది. ఎలక్ట్రానిక్స్, సెమీకండక్టర్ల తయారీలో భారత్ ఇప్పుడు గ్లోబల్ హబ్‌గా మారుతోంది. గతంలో ప్రణాళికా బద్ధం, సోషలిజం అనే పదాలు వాడితే, ఇప్పుడు స్టార్టప్స్, ఈజ్ ఆఫ్ డూయింగ్ బిజినెస్, సంపద సృష్టికర్తలు అనే పదాలు దేశ ఆర్థిక విధానాలను శాసిస్తున్నాయి.