కొద్ది నెలలుగా ఈ సినిమా షూటింగ్ శరవేగంగా కొనసాగుతున్నట్లు తెలుస్తోంది. అయితే ఇప్పటివరకు సినిమా కథ, అల్లు అర్జున్ పాత్ర, ఇతర కీలక అంశాలకు సంబంధించి మేకర్స్ పెద్దగా వివరాలు బయటకు వెల్లడించలేదు. దీంతో సినిమాకు సంబంధించిన ప్రతి చిన్న అప్‌డేట్ కూడా సోషల్ మీడియాలో వైరల్ అవుతోంది. తాజాగా ‘రాకా’ నుంచి విడుదలైన ఒక క్రైప్టిక్ పోస్టర్ ఇప్పుడు అభిమానుల్లో కొత్త చర్చకు కారణమైంది.

మేకర్స్ రిలీజ్ చేసిన ఈ పోస్టర్‌లో ఎలాంటి పాత్రను చూపించలేదు. ఎలాంటి డైలాగ్, టైటిల్ డిజైన్ లేదా ఇతర వివరాలు కూడా కనిపించకుండా డార్క్ బ్యాక్‌డ్రాప్‌లో కేవలం ‘37’ అనే నంబర్‌ను మాత్రమే హైలైట్ చేశారు. సాధారణంగా భారీ సినిమాలకు సంబంధించిన పోస్టర్లలో హీరో లుక్ లేదా కీలకమైన కాన్సెప్ట్‌ను చూపిస్తుంటారు. కానీ ‘రాకా’ టీమ్ మాత్రం కేవలం ఒక నంబర్‌ను మాత్రమే విడుదల చేయడంతో ఆ సంఖ్య వెనుక అసలు అర్థం ఏమిటనే ఆసక్తి మొదలైంది.

ఈ ‘37’ నంబర్‌పై సోషల్ మీడియాలో ఇప్పటికే అనేక రకాల థియరీలు వైరల్ అవుతున్నాయి. ముఖ్యంగా దర్శకుడు అట్లీ పుట్టినరోజు సెప్టెంబర్ 21 కావడంతో అభిమానులు దీనికి ఒక లెక్కను జోడిస్తున్నారు. 3ను 7తో గుణిస్తే 21 వస్తుంది. దీంతో పోస్టర్‌లోని ‘37’ ద్వారా సెప్టెంబర్ 21న ఏదైనా ప్రత్యేకమైన అప్‌డేట్‌ను ప్రకటించబోతున్నారా అనే చర్చ మొదలైంది.

అయితే ‘37’కి సెప్టెంబర్ 21తో నిజంగానే సంబంధం ఉందా? లేక మేకర్స్ కావాలనే అభిమానుల్లో క్యూరియాసిటీ పెంచేందుకు ఈ నంబర్‌ను ఉపయోగించారా? అనేది ప్రస్తుతానికి స్పష్టంగా తెలియదు. సెప్టెంబర్ 21న అట్లీ పుట్టినరోజు కావడంతో అదే రోజున ‘రాకా’ నుంచి ఫస్ట్ లుక్, టీజర్ లేదా మరో కీలకమైన అప్‌డేట్ వచ్చే అవకాశం ఉందని అభిమానులు అంచనా వేస్తున్నారు. అయితే దీనిపై చిత్రబృందం నుంచి అధికారిక ప్రకటన రావాల్సి ఉంది.

ఇక ఈ భారీ చిత్రాన్ని ప్రముఖ నిర్మాణ సంస్థ సన్ పిక్చర్స్ బ్యానర్‌పై అత్యంత భారీ బడ్జెట్‌తో నిర్మిస్తోంది. ప్రొడక్షన్ వాల్యూస్ విషయంలో ఎక్కడా రాజీ పడకుండా సినిమాను రూపొందిస్తున్నట్లు తెలుస్తోంది. ఈ ప్రాజెక్ట్‌లో బాలీవుడ్ స్టార్ నటి దీపికా పదుకొణె కూడా కీలక పాత్రలో నటిస్తున్నారు. ఇప్పటికే ఆమె షూటింగ్‌లో పాల్గొంటున్నట్లు సమాచారం.

మరోవైపు ఈ క్రేజీ ప్రాజెక్ట్‌కు సెన్సేషనల్ యంగ్ మ్యూజిక్ డైరెక్టర్ సాయి అభ్యంకర్ సంగీతం అందిస్తున్నారు. అట్లీ సినిమాల్లో కనిపించే మాస్ ఎలిమెంట్స్, భారీ యాక్షన్ సన్నివేశాలకు ఆయన సంగీతం మరింత బలం చేకూర్చే అవకాశం ఉంది. అల్లు అర్జున్ స్టార్‌డమ్, అట్లీ మేకింగ్ స్టైల్, దీపికా పదుకొణె వంటి భారీ స్టార్ కాస్ట్‌తో ‘రాకా’పై అంచనాలు మరింత పెరిగాయి.

ప్రస్తుతం ఒక్క ‘37’ నంబర్‌తోనే ఇంతటి చర్చకు తెరతీసిన ‘రాకా’ టీమ్.. సెప్టెంబర్ 21న నిజంగానే ఏదైనా భారీ సర్ప్రైజ్ ఇస్తుందా అనేది ఆసక్తికరంగా మారింది. అసలు ఈ నంబర్ వెనుక ఉన్న మిస్టరీ ఏమిటో తెలియాలంటే మేకర్స్ నుంచి వచ్చే తదుపరి అప్‌డేట్ వరకు వేచి చూడాల్సిందే.