ప్రస్తుతం రవితేజ చేస్తున్న సినిమాల్లో ‘ఇరుముడి’ ఒకటి. నిన్నుకోరి, మజిలి లాంటి కల్ట్ సినిమాలు తీసిన శివ నిర్వాణ ఈ మూవీకి దర్శకుడు. ఇప్పటికే రిలీజైన పోస్టర్‌లు గట్రా సినిమాపై మంచి అంచనాలు క్రియేట్ చేశాయి. తాజాగా ఈ సినిమాకు సంబంధించిన ఓ క్రేజీ న్యూస్ సోషల్ మీడియాను షేక్ చేస్తుంది. అదేంటంటే ఈ సినిమాలో రవితేజ కొంత సేపు ఓల్డ్ గెటప్‌లో కనిపించనున్నాడు. ఈ లుక్ షాకింగ్‌గా ఉంటుందని.. అసలు ముసలాడిగా రవితేజ కనిపించే ఎపిసోడ్ మొత్తం ఒక రేంజ్‌లో ఉంటుందని తెలుస్తుంది.

ప్రస్తుతం ఈ సినిమా షూటింగ్ శరవేగంగా జరుగుతుంది. ఈ మూవీ ఒక ఫాదర్-డాటర్ ఎమోషనల్ పీరియాడిక్ డ్రామాగా సాగుతుందట. రవితేజ కూతురుగా బేబి నకాస్ర నటిస్తుంది. అసలు వీళ్ల కాంబినేషన్‌లో వచ్చే సీన్లకు కంటతడి పెట్టడం ఖాయం అని మేకర్స్ చెబుతున్నారు. ఓ సందర్భంలో రవితేజ.. కొన్ని కథలు జీవితంలో సరైన సమయంలో మనల్ని ఎంచుకుంటాయి. అలాంటి ఒక కథే ఈ ఇరుముడి సినిమా. ఇందులో భాగం కావడం అదృష్టంగా భావిస్తున్నానని చెప్పి అసలు ఈ సినిమా కథపై ఏ రేంజ్‌లో నమ్మకం ఉందో చెప్పాడు.

ఈ సినిమాను టాలీవుడ్ స్టార్ ప్రొడక్షన్ సంస్థ మైత్రీ మూవీ మేకర్స్ నిర్మిస్తుంది. ఇక ప్రియా భవానీ శంకర్ హీరోయిన్‌గా నటిస్తుంది. వీరిద్దరి మధ్య కెమిస్ట్రీ తెరపై చాలా సహజంగా కొత్తగా కనిపిస్తుందని టాక్. సంగీత దర్శకుడు జీవీ ప్రకాశ్‌ ఈ సినిమాకు బాణీలు కడుతున్నారు. ఆయన ఇచ్చే నేపథ్య సంగీతం సినిమాలోని ఎమోషనల్ సీన్లను మరో స్థాయికి తీసుకెళ్తుందని దర్శకుడు భావిస్తున్నారు. పాటల విషయంలో కూడా శివ నిర్వాణ ప్రత్యేక శ్రద్ధ తీసుకుంటున్నారు. ప్రస్తుతం శరవేగంగా షూటింగ్ జరుపుకుంటున్న ఈ సినిమా ఇదే ఏడాది ద్వితియార్థంలో రిలీజ్ కాబోతుంది. రిలీజ్ డేట్‌పై త్వరలోనే క్లారిటీ వచ్చే అవకాశం ఉంది.