‘8th వండర్ సినిమాస్’ బ్యానర్‌పై నర్సమ్మ అనే మహిళా రైతు తన భర్తతో కలిసి ఎంతో కష్టపడి, చెమటోడ్చి సంపాదించిన డబ్బుతో ‘స్పిరిట్ ఈజ్ నాట్ వన్’ అనే సినిమాను నిర్మించారు. ఇందుకోసం తమకున్న ఆస్తులను సైతం అమ్ముకుని సర్వస్వం కోల్పోయామని వారు ఆవేదన వ్యక్తం చేస్తున్నారు. ప్రభాస్ సినిమా షూటింగ్ ప్రారంభం కాకముందే.. దాదాపు ఏడాది క్రితమే తమ చిత్రానికి సెన్సార్ సర్టిఫికేట్ కూడా లభించిందని వారు పేర్కొన్నారు. యూట్యూబ్ ఛానెల్స్, మీడియా వేదికల ద్వారా ప్రమోషన్లు పూర్తి చేసుకుని, పోస్టర్లు ముద్రించి, గత నెలలో సినిమాను విడుదల చేయాలని అన్ని ఏర్పాట్లు చేసుకున్నారు.

తమకు ఇండస్ట్రీ నుండి ఎలాంటి మద్దతు లభించడం లేదని, ఈ క్లిష్ట సమయంలో హీరో ప్రభాస్ మాత్రమే పెద్ద మనసుతో జోక్యం చేసుకుని న్యాయం చేయాలని బాధితులు విజ్ఞప్తి చేస్తున్నారు. “ప్రభాస్ గారు, సందీప్ రెడ్డి వంగా గారంటే మాకు ఎంతో అభిమానం. మాతో నేరుగా మాట్లాడి ఉంటే ప్రభాస్ గారి కోసం మా సినిమా టైటిల్ మార్చుకోవడానికి మేము ఎప్పుడో సిద్ధంగా ఉండేవాళ్ళం. లీగల్ నోటీసులతో మమ్మల్ని భయభ్రాంతులకు గురిచేయడం తగదు” అని వారు కోరుతున్నారు. సినిమా విడుదలకు ప్రభాస్ సహాయం అందించి, ఒక రైతు కుటుంబాన్ని ఆదుకోవాలని వారు వేడుకుంటున్నారు. మరి ఈ వివాదంపై ప్రభాస్, సందీప్ రెడ్డి వంగా లేదా భూషణ్ కుమార్ ఎలా స్పందిస్తారో చూడాలి.