ఈ క్రమంలో సభలో ఒక్కసారిగా గందరగోళ పరిస్థితులు తలెత్తాయి. దాదాపు అర్ధగంట ఇదే పరిస్థితి కొనసాగింది. బీఆర్‌ఎస్ సభ్యుల తీరుపై శాసనసభ వ్యవహారాల శాఖ మంత్రి శ్రీధర్ బాబు తీవ్రంగా ఆగ్రహించారు. బీఆర్‌ఎస్ సభ్యులను రెండు రోజుల పాటు సభ నుంచి సస్పెండ్ చేయాలని ప్రతిపాదనలు చేశారు. దీంతో బడ్జెట్‌పై చర్చకు అడ్డు పడుతున్నందన బీఆర్‌ఎస్ ఎమ్మెల్యేలను సభ నుంచి సస్పెండ్ చేసి బయటకు పంపించేశారు. దీంతో కేటీఆర్, హరీశ్ రావుతో సహా ఆ పార్టీ ఎమ్మెల్యేలను రెండు రోజుల పాటు సభను స్పీకర్ సస్పెండ్ చేస్తున్నట్లు ప్రకటించారు.

బీఆర్‌ఎస్ నేతలు కౌశిక్ రెడ్డి తీరును సమర్థిస్తే మాత్రం అసెంబ్లీలో కత్తిపోట్లు జరుగుతాయని హెచ్చరించారు. ఈ క్రమంలో కౌశిక్ రెడ్డి ప్రవర్తన తీరును సుమోటోగా విచారణకు స్వీకరించి ఎథిక్స్ కమిటీకి సిఫార్సు చేయాలని సీఎం రేవంత్ రెడ్డి డిమాండ్ చేశారు. అలాగే ఎథిక్స్ కమిటీ నివేదిక ఆధారంగానే చర్యలు తీసుకోవాలని ఆయన విజ్ఞప్తి చేశారు. బీఆర్‌ఎస్ సభ్యులు సభకు సహకరిస్తేనే సభలో ఉంచాలని, అడ్డుకునే శైలి ఉంటే మాత్రం తదుపరి సమావేశాల వరకూ వారిని సస్పెండ్ చేయాలని కోరారు. దీంతో కౌశిక్ రెడ్డి వ్యవహారాన్ని ఎథిక్స్ కమిటీకి సిఫార్సు చేస్తూ అసెంబ్లీ తీర్మానం చేసింది. ఈ కమిటీ ఇచ్చిన నివేదిక ఆధారంగా కౌశిక్ రెడ్డిపై చర్యలకు ఉపక్రమించవచ్చు.