విఐపీ విరామ సమయంలో స్వామివారి సేవలో పాల్గొన్న విజయ్ కుమార్ ఒంటిపై దాదాపు ఐదు కిలోల బంగారు నగలను ధరించడం చర్చనీయాంశమైంది. రెండు చేతుల వేళ్లన్నింటికీ బంగారు ఉంగరాలు, భారీ కంకణాలు, మెడ నిండా మందమైన బంగారు గొలుసులతో దర్శనానికి వచ్చిన ఆయనను చూసి భక్తులు ఆశ్చర్యపోయారు. క్యూలైన్లలో ఉన్న పలువురు భక్తులు ఆయనతో ఫొటోలు దిగేందుకు ఆసక్తి చూపగా, మరికొందరు “గోల్డ్ మ్యాన్” అంటూ చర్చించుకున్నారు. తిరుమలలో భక్తి వాతావరణం మధ్య ఆయన ధరించిన బంగారు ఆభరణాలు ప్రత్యేక ఆకర్షణగా నిలిచాయి.

అదే సమయంలో తెలుగు సినీ నటి మణి చందన కూడా తిరుమల శ్రీ వేంకటేశ్వర స్వామివారిని దర్శించుకుని మొక్కులు చెల్లించుకున్నారు. బుధవారం ఉదయం విఐపీ విరామ సమయంలో స్వామివారి సేవలో పాల్గొన్న ఆమె దర్శనం అనంతరం ఆలయ రంగనాయకుల మండపంలో వేద పండితుల నుంచి ఆశీర్వచనం అందుకున్నారు. అనంతరం టీటీడీ అధికారులు శ్రీవారి తీర్థప్రసాదాలు అందజేసి పట్టువస్త్రంతో ఘనంగా సత్కరించారు. ఆలయ పరిసరాల్లో అభిమానులు ఆమెను చూసేందుకు ఆసక్తి చూపగా, ఆమె భక్తులతో ఆత్మీయంగా పలకరించారు. ఒకవైపు బంగారు ఆభరణాలతో వచ్చిన “గోల్డ్ మ్యాన్”, మరోవైపు సినీనటి మణి చందన దర్శనం.

తిరుమల శ్రీవారిని గోల్డ్ మెన్ దర్శించుకోవడం ఇప్పుడు కొత్తేమి కాదు. గతంలో కూడా అంటే గతేడాది జనవరి 1న కూడా గోల్డ్ మాన్ విజయ్ కుమార్ శ్రీవారిని దర్శించుకున్నారు. కర్ణాటకకు చెందిన మరో గోల్డెన్ మెన్ రవి 5 కేజీల బంగారు నగలు ధరించి తిరుమల శ్రీవారిని గతంలో ఓసారి దర్శించుకున్నారు. అలాగే గడ్డిపాటి సాంబశివరావు అనే మరో భక్తుడు కూడా శరీరంపై నగలు, మెడలో బంగారు గొలుసులు, చేతులకు స్వర్ణ కంకణాలు ధరించి తిరుమలకు రావడం .. ఆ ఫోటోలు, వీడియోలు ఇప్పటికి నెట్టింట్లో తెగ వైరల్ అవుతున్నాయి.