తిరుమల క్షేత్రం రాజకీయాలకు, వ్యక్తిగత ప్రచారాలకు అతీతమైన ఆధ్యాత్మిక కేంద్రంగా భావిస్తారు. ప్రతి రోజు లక్షలాది మంది భక్తులు శ్రీవారి దర్శనానికి వచ్చే ఈ పవిత్ర ప్రదేశంలో భక్తి, ఆధ్యాత్మికతకు మాత్రమే ప్రాధాన్యత ఉండాలని భక్తులు పేర్కొంటున్నారు. అలాంటి చోట ఒక రాజకీయ నాయకుడికి సంబంధించిన పుస్తకాన్ని ప్రదర్శిస్తూ వీడియో తీయడం సరైన చర్య కాదని పలువురు అభిప్రాయపడుతున్నారు.

ముఖ్యంగా తిరుమలలో రాజకీయ ప్రచారాలు, నినాదాలు, బ్యానర్లు, వ్యక్తిగత ప్రదర్శనలపై టీటీడీ ఇప్పటికే కఠిన నిబంధనలు అమలు చేస్తోంది. క్షేత్ర పవిత్రతను దృష్టిలో ఉంచుకుని ఇటువంటి కార్యకలాపాలను నిరోధించే ప్రయత్నాలు కొనసాగుతున్నాయి. ఈ నేపథ్యంలో అఖిలాండం వంటి అత్యంత పవిత్రమైన ప్రాంతంలో వీడియో చిత్రీకరణ జరగడం నిబంధనల ఉల్లంఘన కింద పరిగణించాలా అనే చర్చ కూడా మొదలైంది.

వీడియో సోషల్ మీడియాలో వేగంగా వ్యాపించడంతో భక్తుల్లో అసంతృప్తి వ్యక్తమవుతోంది. శ్రీవారి సన్నిధిలో రాజకీయ గుర్తింపులు, అభిమాన ప్రదర్శనలు కాకుండా ఆధ్యాత్మిక భావనలకే ప్రాధాన్యత ఇవ్వాలని పలువురు కోరుతున్నారు. తిరుమల గౌరవాన్ని కాపాడడం ప్రతి భక్తుడి బాధ్యత అని, వ్యక్తిగత అభిమానం ఎంత ఉన్నా క్షేత్ర మర్యాదలను పాటించాల్సిందేనని సూచిస్తున్నారు.

మరోవైపు ఈ ఘటనపై టీటీడీ అధికారులు స్పందిస్తారా? వీడియోలో కనిపించిన వారిపై ఏవైనా చర్యలు తీసుకుంటారా? అనే అంశాలు ఇప్పుడు చర్చనీయాంశంగా మారాయి. వైరల్ వీడియో నేపథ్యంలో తిరుమలలో అమలవుతున్న నిబంధనలపై మరోసారి దృష్టి సారించిన భక్తులు, పవిత్ర క్షేత్రాల్లో రాజకీయాలకు అతీతంగా వ్యవహరించాల్సిన అవసరాన్ని గుర్తు చేస్తున్నారు.