సుదూర తీర్థయాత్రలు, రాత్రి వేళ సుదీర్ఘ ప్రయాణాలు చేసేటప్పుడు జనం అత్యధికంగా సౌకర్యానికే పెద్దపీట వేస్తున్నారు. తాజా బుకింగ్స్ ఆధారంగా ప్రయాణికుల ప్రాధాన్యతలను పరిశీలిస్తే 65 శాతం మంది ప్రయాణికులు ఏసీ బస్సులకే ఓటు వేశారు. వేసవి తాపం నుంచి తప్పించుకుంటూ, ఎండల బారిన పడకుండా ప్రశాంతంగా గమ్యం చేరుకునేందుకు ఏసీ బస్సులను ఎక్కువగా ఎంచుకుంటున్నారు. బస్సుల రకాలను చూస్తే 58 శాతం మంది నిద్రపోయేందుకు వీలుగా ఉండే స్లీపర్ బస్సులను బుక్ చేసుకోగా, కేవలం 42 శాతం మంది మాత్రమే సీటర్ బస్సులకు ప్రాధాన్యం ఇచ్చారు. రాత్రిపూట ప్రయాణించే వారు నిద్రపోతూ హాయిగా వెళ్లేందుకు స్లీపర్ బస్సుల వైపే మొగ్గుచూపుతున్నారని ఈ గణాంకాలు చెబుతున్నాయి.

ప్రస్తుత రద్దీ ఆధారంగా ప్రాంతీయ ప్రయాణాల్లో హైదరాబాద్-విజయవాడ, విజయవాడ-విశాఖపట్నం, విజయవాడ-తిరుపతి, విశాఖపట్నం-హైదరాబాద్, హైదరాబాద్-నెల్లూరు మార్గాల్లో రాకపోకలు అత్యధికంగా సాగుతున్నాయి. అంతర్రాష్ట్ర ప్రయాణాలకు వస్తే హైదరాబాద్-బెంగళూరు, తిరుపతి-బెంగళూరు, హైదరాబాద్-చెన్నై, హైదరాబాద్-పూణే మార్గాలకు విపరీతమైన డిమాండ్ ఉంది. తెలంగాణ రాజధాని హైదరాబాద్‌లో ప్రధానంగా ఎంజీబీఎస్ బస్ స్టేషన్, కూకట్‌పల్లి, గచ్చిబౌలి, మియాపూర్, లక్డికాపూల్, అమీర్‌పేట్ ప్రాంతాల నుంచి ప్రయాణికులు అధికంగా బస్సులు ఎక్కుతున్నట్లు రెడ్‌బస్ గణాంకాలు స్పష్టం చేస్తున్నాయి. ఇవన్నీ నగరంలో అత్యంత రద్దీ ఉండే బోర్డింగ్ పాయింట్లుగా నిలిచాయి.