Last Updated:
Tirupati: తిరుపతి జిల్లా సత్యవేడు నియోజకవర్గ పరిధిలోని వరదయ్యపాలెం సమీపంలో ఉన్న శ్రీసిటీ పారిశ్రామికవాడలో పెను విషాదం చోటుచేసుకుంది.
స్థానికంగా ఉన్న ఒక ప్రైవేటు కర్మాగారంలో శనివారం ఒక్కసారిగా బాయిలర్ పేలి తీవ్ర ప్రమాదం సంభవించింది. ఈ భయానక ఘటనలో ఐదుగురు కార్మికులు అక్కడికక్కడే సజీవదహనమయ్యారని, మరో పది మందికి పైగా తీవ్ర గాయాలయ్యాయని ప్రాథమిక సమాచారం ద్వారా తెలుస్తోంది. పరిశ్రమల ప్రాంతంపరిశ్రమలో రోజువారీ పనులు శరవేగంగా సాగుతున్న సమయంలో ఈ భారీ విస్ఫోటనం సంభవించింది. కార్మికులు తమ విధుల్లో నిమగ్నమై ఉండగా, కర్మాగారంలోని బాయిలర్ యూనిట్ నుండి భారీ శబ్దంతో పేలుడు సంభవించింది. పేలుడు తీవ్రతకు కర్మాగారంలోని షెడ్డు పైకప్పు రేకులు, పరికరాలు దూరంగా ఎగిరిపడ్డాయి. ఆ వెంటనే పరిశ్రమ ప్రాంగణంలో భారీగా మంటలు చెలరేగడంతో పాటు ఆకాశమంతటా దట్టమైన పొగలు కమ్ముకున్నాయి. భీకర శబ్దం, చెలరేగిన మంటలతో ప్రాణభయంతో కార్మికులు పరుగులు తీశారు. ప్రమాద తీవ్రత కారణంగా సమీపంలో ఉన్న పలువురు కార్మికులు తప్పించుకోలేక మంటల్లో చిక్కుకుపోయారు.
సమాచారం అందుకున్న వెంటనే అగ్నిమాపక దళాలు, స్థానిక పోలీసులు ఘటనా స్థలానికి చేరుకున్నారు. ఫైర్ ఇంజిన్ల సాయంతో అగ్నిమాపక సిబ్బంది తీవ్రంగా శ్రమించి మంటలను అదుపులోకి తెచ్చేందుకు సహాయక చర్యలు చేపట్టారు. శిథిలాల కింద చిక్కుకున్న క్షతగాత్రులను రెస్క్యూ బృందాలు బయటకు తీసుకొచ్చాయి. తీవ్రంగా గాయపడిన పది మందికి పైగా కార్మికులను అత్యవసర అంబులెన్సుల్లో సమీపంలోని ఏరియా ఆసుపత్రితో పాటు మెరుగైన చికిత్స కోసం తిరుపతిలోని రుయా, స్విమ్స్ ఆసుపత్రులకు తరలించారు. గాయపడిన వారిలో కొందరి పరిస్థితి అత్యంత విషమంగా ఉందని, వారిలో ఎక్కువ శాతం కాలిన గాయాలతో బాధపడుతున్నారని వైద్య వర్గాలు తెలిపాయి.
ఈ దుర్ఘటనతో పరిశ్రమ ప్రాంగణంలో తీవ్ర విషాద ఛాయలు అలముకున్నాయి. ప్రమాద సమయంలో యూనిట్‌లో ఎంతమంది కార్మికులు విధులు నిర్వహిస్తున్నారు, మృతుల వివరాలు ఇంకా పూర్తిగా తెలియాల్సి ఉంది. కాగా, కర్మాగారంలో కనీస పారిశ్రామిక భద్రతా ప్రమాణాలు పాటించకపోవడం, బాయిలర్ నిర్వహణ సరిగా లేకపోవడమే ఈ భారీ ప్రమాదానికి కారణమై ఉండవచ్చని కార్మిక సంఘాలు ఆరోపిస్తున్నాయి. పోలీసులు ఈ ఘటనపై కేసు నమోదు చేసుకుని దర్యాప్తు ప్రారంభించారు. జిల్లా ఉన్నతాధికారులు సైతం ఘటనా స్థలానికి చేరుకుని పరిస్థితిని సమీక్షిస్తున్నారు.
