హైదరాబాద్ నగరవాసులకు, నిత్యం ట్రాఫిక్ తో పోరాడే వాహనదారులకు ఇది ముఖ్య గమనిక. మీరు అత్తాపూర్, బండ్లగూడ, రాజేంద్రనగర్ వైపు ప్రయాణించే వారైతే మీ రూట్ మ్యాప్ మార్చుకోవాల్సిన సమయం ఆసన్నమైంది. నగరంలోని అత్తాపూర్ వంతెన వద్ద నేటి నుంచి వారం రోజుల పాటు భారీ ట్రాఫిక్ ఆంక్షలు అమలులోకి వచ్చాయి. లంగర్‌హౌస్, బాపుఘాట్ సమీపంలోని హైదర్‌గూడ శ్మశానవాటిక వద్ద ఉన్న అత్తాపూర్ బ్రిడ్జి మార్గంలో ఈ నెల 4వ తేదీ నుంచి 11వ తేదీ వరకు వాహనాల రాకపోకలను పూర్తిగా నిలిపివేస్తూ సైబరాబాద్ ట్రాఫిక్ పోలీసులు కీలక నిర్ణయం తీసుకున్నారు. ఈ మార్గంలో ప్రయాణించే వారు ప్రత్యామ్నాయ దారులు చూసుకోవాలని సూచించారు.