విమర్శలకు సమాధానమిస్తూ సెలెక్టర్ ప్రరంజన్ కొన్ని కీలక విషయాలను వెల్లడించారు. “మేం వైభవ్‌ను జట్టు సారథిగా చేయలేదు, కేవలం వైస్ కెప్టెన్‌గా మాత్రమే నియమించాం. ఈస్ట్ జోన్ జట్టుకు ఇషాన్ కిషన్ కెప్టెన్‌గా వ్యవహరిస్తాడు. వికెట్ కీపర్‌గా రోజంతా మైదానంలో యాక్టివ్‌గా ఉండే ఇషాన్ నాయకత్వాన్ని నడిపిస్తాడు. వైభవ్ కెప్టెన్సీ భారం మోయాల్సిన అవసరం లేదు. కానీ రోజురోజుకూ పరిణతి చెందుతున్న ఈ కుర్రాడికి ఇలాంటి చిన్నపాటి బాధ్యతలు ఇవ్వడం వల్ల భవిష్యత్తులో ఎంతగానో ఉపయోగపడతాయి. ఇది అతడికి దక్కిన ఒక గొప్ప అవకాశం. భవిష్యత్తులో వైభవ్ ఏదో ఒక రోజు టీమ్‌ఇండియాకు కెప్టెన్ అయినా ఆశ్చర్యపోనక్కర్లేదు” అని ధీమా వ్యక్తం చేశారు.

ఐపీఎల్‌తో పాటు ఇటీవల భారత జట్టు తరఫున, దేశవాళీ టోర్నీలలో బీహార్ జట్టుకు వైస్ కెప్టెన్‌గా వైభవ్ అద్భుత ప్రదర్శన చేశాడని సెలెక్టర్ ప్రరంజన్ గుర్తుచేశారు. “వైభవ్‌ను వైస్ కెప్టెన్‌గా నియమించాలనే నిర్ణయాన్ని ఎంపిక కమిటీ సభ్యులంతా ఏకగ్రీవంగా, కలిసికట్టుగా తీసుకున్నారు. బయట ఉన్నవారు ఎవరికి తోచిన రీతిలో వారు వ్యాఖ్యలు చేస్తుంటారు. అందరి ఆలోచనా దృక్పథం ఒకేలా ఉండదు. సెలెక్టర్లుగా మేం ఏం నిర్ణయం తీసుకున్నా అది మా జట్టు శ్రేయస్సు కోసమే” అని ఆయన స్పష్టం చేశారు. నాయకత్వ అనుభవం వైభవ్‌ను మైదానంలో మరింత బాధ్యతాయుతంగా మార్చడానికి తోడ్పడుతుందని సెలెక్షన్ కమిటీ భావిస్తోంది.