వన్డే క్రికెట్‌లో 40 ఓవర్ల పాటు బౌండరీ లైన్ దగ్గర ఫీల్డింగ్ చేయమన్నా ఒక్క ఫిర్యాదు కూడా చేయకుండా చేస్తానని కోహ్లీ స్పష్టం చేశాడు. తాను ప్రతీ బంతిని తన కెరీర్‌లో ఆడే చివరి బంతిలా భావించి ఆడుతానని, జట్టు కోసం ఎంత కష్టపడటానికైనా సిద్ధమని తెలిపాడు. కానీ, ఇదంతా చేసిన తర్వాత కూడా ఎవరైనా తనను అనుమానిస్తే ఆ ప్లేస్‌లో తాను ఉండనని కరాఖండిగా చెప్పాడు.

ఆస్ట్రేలియా సిరీస్ తర్వాత దక్షిణాఫ్రికాపై వరుసగా సెంచరీలు చేసిన సమయంలో తన మైండ్‌సెట్ ఎలా ఉందో కూడా కోహ్లీ వివరించాడు. ఎవరికీ ఏదీ నిరూపించుకోవడానికి కాకుండా, కేవలం ఆటపై ఉన్న ప్రేమతోనే ఆడానని చెప్పాడు. విజయ్ హజారే ట్రోఫీ ఆడినప్పుడు కూడా చిన్న పిల్లాడిలా ఎంజాయ్ చేశానని గుర్తుచేసుకున్నాడు.

“మీపై మాకు నమ్మకం ఉందంటూనే, వారం తర్వాత మన పనితీరును ప్రశ్నించడం ఏమాత్రం కరెక్ట్ కాదు. నమ్మకం ఉంటే సైలెంట్‌గా ఉండాలి. ఫలితాలను బట్టి మాటలు మార్చకూడదు” అని కోహ్లీ ఘాటుగా సమాధానమిచ్చాడు. తాను ఎప్పుడూ ఒకేలా ఉంటానని, ఏ సిరీస్‌కు ముందు రెండు మూడు వారాలు హడావిడిగా కష్టపడనని, ఏడాది పొడవునా ఫిట్‌నెస్‌ను కాపాడుకుంటానని వివరించాడు. “నేను నా ఇల్లు వదిలి ఎందుకు వస్తాను? ఆడుతున్నానంటే క్రికెట్ కోసం, ఇండియాకు వరల్డ్ కప్ తీసుకురావాలనే లక్ష్యంతోనే వస్తాను” అని కోహ్లీ ముగించాడు. ఈ వ్యాఖ్యలు ఇప్పుడు క్రీడా వర్గాల్లో తీవ్ర చర్చనీయాంశంగా మారాయి.