కేజీఎఫ్ సినిమాలతో దేశవ్యాప్తంగా సెన్సేషన్ సృష్టించిన యశ్, ప్రస్తుతం ‘టాక్సిక్’ సినిమాపై ప్రత్యేక దృష్టి పెట్టారు. గీతూ మోహన్‌దాస్ దర్శకత్వంలో రూపొందుతున్న ఈ చిత్రంపై ప్రారంభం నుంచే భారీ అంచనాలు ఉన్నాయి. అయితే షూటింగ్ ఆలస్యం, అంతర్జాతీయ పంపిణీ ప్రణాళికలు, పలు సాంకేతిక కారణాల వల్ల సినిమా విడుదల తేదీ పలుమార్లు మారింది. మొదట ప్రకటించిన తేదీలు వాయిదా పడటంతో అభిమానులు నిరాశ చెందారు. కానీ తాజాగా యశ్ స్వయంగా సోషల్ మీడియాలో కొత్త పోస్టర్‌ను విడుదల చేస్తూ రిలీజ్ డేట్‌ను ఖరారు చేశారు.

ప్రపంచవ్యాప్తంగా ‘టాక్సిక్’ చిత్రం 2026 ఆగస్టు 26న గ్రాండ్‌గా విడుదల కానుంది. ఈ విషయాన్ని ప్రకటిస్తూ విడుదల చేసిన పోస్టర్ సోషల్ మీడియాలో వైరల్ అవుతోంది. ఈ సినిమా కోసం యశ్ పూర్తిగా కొత్త లుక్‌లో కనిపించనున్నాడు. ఇప్పటికే విడుదలైన పోస్టర్లు, కాన్సెప్ట్ వీడియోలు అభిమానుల్లో అంచనాలను మరింత పెంచేశాయి.

‘టాక్సిక్’ కేవలం ఒక యాక్షన్ సినిమా మాత్రమే కాదని, పెద్దల కోసం రూపొందించిన డార్క్ ఫెయిరీ టేల్ తరహా కథాంశంతో వస్తోందని చిత్రబృందం ముందే వెల్లడించింది. హాలీవుడ్ స్థాయి టెక్నికల్ వాల్యూస్‌తో తెరకెక్కుతున్న ఈ చిత్రంలో యశ్ నటుడిగానే కాకుండా నిర్మాతగా కూడా కీలక బాధ్యతలు నిర్వర్తిస్తున్నారు. ప్రపంచవ్యాప్తంగా అన్ని ప్రధాన భాషల్లో ఈ సినిమా విడుదల కానుండటంతో బాక్సాఫీస్ వద్ద భారీ సంచలనం సృష్టిస్తుందని సినీ విశ్లేషకులు భావిస్తున్నారు.

ఇప్పటికే ‘కేజీఎఫ్’ సిరీస్‌తో పాన్ ఇండియా స్టార్‌గా ఎదిగిన యశ్, ‘టాక్సిక్’తో మరోసారి తన సత్తా చాటేందుకు సిద్ధమవుతున్నారు. ఎన్నో వాయిదాల తర్వాత విడుదల తేదీ ఖరారు కావడంతో అభిమానులు సోషల్ మీడియాలో సంబరాలు చేసుకుంటున్నారు. ఆగస్టు 26 కోసం కౌంట్‌డౌన్ కూడా ప్రారంభమైంది. ఇక ‘టాక్సిక్’ బాక్సాఫీస్ వద్ద ఎలాంటి రికార్డులు సృష్టిస్తుందో చూడాలని సినీ ప్రియులు ఆసక్తిగా ఎదురుచూస్తున్నారు.