Last Updated:
తిరుపతిలో టీటీడీ ఆధ్వర్యంలో శ్రీ రామానుజాచార్యుల అవతార మహోత్సవాలు ఏప్రిల్ 20 నుంచి 22 వరకు అన్నమాచార్య కళామందిరంలో భక్తి కార్యక్రమాలతో జరగనున్నాయి
తిరుపతిలో భక్తి వాతావరణం మరింత పరవశించనుంది. టీటీడీ ఆధ్వర్యంలో శ్రీ భగవద్ రామానుజాచార్యుల అవతార మహోత్సవాలు ఘనంగా నిర్వహించేందుకు అన్ని ఏర్పాట్లు పూర్తయ్యాయి. టీటీడీ ఆళ్వార్ దివ్యప్రబంధ ప్రాజెక్టు సమన్వయంతో ఈ మహోత్సవాలను ఏప్రిల్ 20 నుంచి 22వ తేదీ వరకు తిరుపతిలోని అన్నమాచార్య కళామందిరంలో వైభవంగా నిర్వహించనున్నారు.
మూడు రోజుల పాటు సాగే ఈ మహోత్సవాలు ప్రతి రోజూ సాయంత్రం 6 గంటల నుంచి రాత్రి 8.30 గంటల వరకు భక్తి, ఆధ్యాత్మికతల మేళవింపుగా కొనసాగనున్నాయి. సాహితీ సదస్సులు, ఆధ్యాత్మిక ఉపన్యాసాలు, భక్తి సంగీత కార్యక్రమాలు భక్తులకు ఆధ్యాత్మిక ఆనందాన్ని పంచేలా ప్రత్యేకంగా రూపకల్పన చేశారు.
మొదటి రోజు అయిన ఏప్రిల్ 20న సాయంత్రం 5.30 గంటలకు తిరుమల పెద్ద జీయర్ స్వామి, చిన్న జీయర్ స్వామివారి మంగళాశాసనాలతో మహోత్సవాలు ఘనంగా ప్రారంభమవుతాయి. అనంతరం శ్రీ రామానుజాచార్యుల వైభవం అనే అంశంపై ఆధ్యాత్మిక ఉపన్యాసం నిర్వహించనుండగా, ఆ తర్వాత భక్తి సంగీత కార్యక్రమం భక్తులను మంత్రముగ్ధులను చేయనుంది.
రెండవ రోజు ఏప్రిల్ 21న “శ్రీ రామానుజాచార్యులు తిరుమల కైంకర్యము” అనే అంశంపై ప్రసంగం నిర్వహించబడుతుంది. అనంతరం హరికథ కార్యక్రమం ద్వారా ఆయన ఆధ్యాత్మిక సేవలు, వైష్ణవ సంప్రదాయంపై ఆయన చూపిన మార్గాన్ని భక్తులకు వివరిస్తారు.
చివరి రోజు ఏప్రిల్ 22న శ్రీ రామానుజాచార్యులు.. గ్రంథములు అనే అంశంపై ఉపన్యాసం నిర్వహించి, అనంతరం భక్తి సంగీత కార్యక్రమంతో మహోత్సవాలు ముగియనున్నాయి. రామానుజాచార్యుల జీవితం, సేవలు, గ్రంథ సంపదపై భక్తులకు అవగాహన కల్పించడం ఈ కార్యక్రమాల ముఖ్య ఉద్దేశ్యంగా టీటీడీ అధికారులు తెలిపారు. ఈ మూడు రోజుల మహోత్సవాలు తిరుపతిలో ఆధ్యాత్మిక వైభవాన్ని మరింత పెంచనున్నాయి.
Click here to add News18 as your preferred news source on Google. ఆంధ్రప్రదేశ్లోని ముఖ్యమైన వార్తలు, లేటెస్ట్ న్యూస్, స్థానిక వార్తలు, ప్రభుత్వ పథకాలు, ప్రభుత్వ ప్రకటనలు, అన్ని రాజకీయ పార్టీలకు సంబంధించిన స్టోరీలను న్యూస్18 తెలుగు ఆంధ్రప్రదేశ్ కేటగిరీలో చదవండి. మరిన్ని వార్తల కోసం న్యూస్ 18 తెలుగు ఫాలో అవండి.
Tirupati,Chittoor,Andhra Pradesh
