హరి నారాయణ తన తల్లి, భార్య, కూతురితో కలిసి పల్లెటూరిలో చాలా సాదాసీదా జీవితం గడుపుతుంటాడు. ఆర్థిక ఇబ్బందులు, కుటుంబ పోషణ భారంతో సతమతమవుతున్న అతని జీవితంలోకి అనుకోకుండా ఒక లాటరీ రూపంలో అదృష్టం తలుపు తడుతుంది. అతడు సరదాగా కొన్న ఒక లాటరీ టికెట్‌‌కు ఏకంగా ఒక కోటి రూపాయల భారీ బహుమతి వస్తుంది. ఇక తమ కష్టాలన్నీ తీరిపోయాయని, జీవితం మారిపోయిందని ఆ కుటుంబం సంబరపడేలోపే ఒక ఊహించని సమస్య ఎదురవుతుంది. కోటి రూపాయలు తెచ్చిపెట్టే ఆ లాటరీ టికెట్ ఇంట్లో అకస్మాత్తుగా కనిపించకుండా పోతుంది.

ఒక్కసారిగా భారీ మొత్తం చేతికి వస్తుందనే ఆశ, అది చేజారినప్పుడు కలిగే ఆందోళన మానవ సహజమైన లక్షణాలు. ఈ పాయింట్‌ను దర్శకుడు అరవింద్ రెడ్డి పల్లెటూరి వాతావరణంలో చాలా సహజంగా, కన్విన్సింగ్‌గా నడిపించారు. కుటుంబ సభ్యుల మధ్య సంభాషణలు, ఊరి జనం ప్రవర్తన, వారి అమాయకత్వం ఎలాంటి నాటకీయత లేకుండా స్వచ్ఛంగా సాగుతాయి. ప్రధాన పాత్రల్లో నటించిన వారంతా కొత్తవారే అయినప్పటికీ చాలా న్యాచురల్ గా నటించారు. కుటుంబ సమస్యలతో సతమతమయ్యే సామాన్యుడి పాత్రలో అరవింద్ పండ్రాతే తనలోని ఆందోళనను, నిస్సహాయతను అద్భుతంగా పండించాడు. శ్రావణి మల్కాని, వేణు పోల్సాని, డి. అనుదీప్, క్రాక్ శ్రీమణి, విషన్ శ్రీ, కావ్యశ్రీ మాదిశెట్టి తదితరులు తమ పాత్రల పరిధి మేరకు అద్భుతంగా నటించి సినిమాకు మరింత సహజత్వాన్ని తీసుకొచ్చారు.

సెకండాఫ్ లో కథ ఇంటి నుంచి ఊరి పరిసరాల్లోకి విస్తరించినప్పుడు కథనం వేగం పుంజుకుంటుంది. ముఖ్యంగా హరికి, ఆ అపరిచితుడికి మధ్య సాగే ఫోన్ సంభాషణలు, ఎత్తుకు పైఎత్తులు ఆడియన్స్‌లో మంచి క్యూరియాసిటీని రేకెత్తిస్తాయి. క్లైమాక్స్ సన్నివేశాలు కూడా చాలా లాజికల్ గా, సంతృప్తికరంగా ముగుస్తాయి. టెక్నికల్ పరంగా చూస్తే.. జింకా వరుణ్ నాయుడు కెమెరా పనితనం గ్రామీణ లొకేషన్లను ఎక్కడా కృత్రిమత్వం లేకుండా వాస్తవికంగా బంధించింది. రిషి ఎం అందించిన నేపథ్య సంగీతం ఉత్కంఠను, హాస్యాన్ని ఎలివేట్ చేయడంలో సక్సెస్ అయింది. రవితేజ గిరిజాల ఎడిటింగ్ బాగుంది.