2008 సంవత్సరంలో శోభన్ బాబు గుండెపోటుతో ఆకస్మికంగా మరణించారు. అప్పటి నుంచి శాంతకుమారి తన కుటుంబ సభ్యులతో కలిసి చెన్నైలోనే నివాసం ఉంటున్నారు. భర్త మరణం తర్వాత ఆమె పూర్తిగా ప్రజా జీవితానికి దూరంగా ప్రశాంతంగా కాలం గడిపారు. చెన్నైలోని వారి నివాసానికి శాంతకుమారి పార్థివ దేహాన్ని తరలించగా, నేడు (శుక్రవారం) అంత్యక్రియలు నిర్వహించనున్నట్లు కుటుంబ వర్గాలు వెల్లడించాయి.

తెలుగు సినీ చరిత్రలో శోభన్ బాబు నటనకే కాకుండా, ఆయన క్రమశిక్షణకు, పక్కా ప్రణాళికలకు ఎంతో పేరుంది. ఆయన సాధించిన ఆ విజయాల వెనుక శాంతకుమారి పాత్ర ఎంతో కీలకమనీ, కుటుంబ బాధ్యతలను ఆమె ఎంతో శ్రద్ధగా చూసుకున్నారని సినీ విశ్లేషకులు గుర్తుచేసుకుంటున్నారు. ఇటీవల రెండు నెలల కిందటే శాంతకుమారి ఒక మీడియా ఇంటర్వ్యూలో కనిపించారనీ, అప్పుడు ఆరోగ్యంగా ఉన్న ఆమె ఇంతలోనే మరణించడం తీవ్రంగా కలచివేసిందని అభిమానులు ఆవేదన వ్యక్తం చేస్తున్నారు. శాంతకుమారి మరణవార్త తెలుసుకున్న వెంటనే టాలీవుడ్ ప్రముఖులు, నిర్మాతలు, నటీనటులు సోషల్ మీడియా వేదికగా నివాళులు అర్పిస్తూ, వారి కుటుంబానికి తమ ప్రగాఢ సానుభూతిని తెలియజేస్తున్నారు.