గ్లోబల్ క్రికెట్ రంగంలో తమ ఉనికిని మరింత విస్తరించే క్రమంలో యాంకర్ స్పోర్ట్స్ యజమాని నాగేంద్ర సిద్ధౌటమ్, జహీర్ ఖాన్‌తో కలిసి ఈ ఫ్రాంచైజీ బాధ్యతలను స్వీకరించారు. యాంకర్ స్పోర్ట్స్ గ్రూప్ ఇప్పటికే యూరోపియన్ T20 ప్రీమియర్ లీగ్ (బెల్జియం)లోని ‘యాంట్వెర్ప్ యాంకర్స్’, అలాగే కెనడా సూపర్ 60 లీగ్‌లోని ‘వాంకోవర్ యాంకర్స్’ (పురుషుల, మహిళల) జట్లను సొంతం చేసుకుంది. ప్రస్తుతం కొనసాగుతున్న లంక ప్రీమియర్ లీగ్ పాయింట్ల పట్టికలో జాఫ్నా జట్టు టాప్-2 స్థానాల్లో కొనసాగుతోంది.

యాంకర్ స్పోర్ట్స్‌ను లీగ్‌లోకి ఆహ్వానిస్తూ టోర్నమెంట్ హక్కుల నిర్వాహక సంస్థ (IPG) ఛైర్మన్, సీఈఓ అనిల్ మోహన్ మాట్లాడుతూ.. “యాంకర్ స్పోర్ట్స్ గ్రూప్‌ను ఎల్‌పీఎల్ కుటుంబంలోకి సాదరంగా ఆహ్వానిస్తున్నాం. లీగ్ ఆరేళ్ల చరిత్రలో 4 సార్లు ఛాంపియన్‌గా నిలిచి జాఫ్నా జట్టు ఓ ఘనమైన రికార్డును నెలకొల్పింది. కొత్త యాజమాన్యం ఈ జట్టుకు సరికొత్త విజన్‌ను, శక్తుల్ని అందిస్తూ లీగ్ ప్రమాణాలను మరింత పెంచుతుందని ఆశిస్తున్నాం” అని పేర్కొన్నారు.

యాంకర్ జాఫ్నా కింగ్స్ సహ యజమానిగా బాధ్యతలు స్వీకరించడంపై జహీర్ ఖాన్ సంతోషం వ్యక్తం చేస్తూ ఒక ప్రకటన విడుదల చేశారు. “శ్రీలంక నుంచి వచ్చే బౌలింగ్ ప్రతిభ, నైపుణ్యాలను నేను ఎప్పుడూ ఆరాధిస్తాను. లంక నాకెంతో ఇష్టమైన దేశం. ఎన్నో మ్యాచ్‌లు అక్కడ ఆడాను.. మరెన్నో మధుర జ్ఞాపకాలు ఉన్నాయి. ఇప్పుడు అదే శ్రీలంక క్రికెట్‌లో ఒక జట్టుకు యజమానిగా భాగం కావడం ఎంతో ఉత్సాహాన్నిస్తోంది. యాంకర్ జాఫ్నా కింగ్స్‌తో నా కొత్త ప్రయాణాన్ని ప్రారంభించేందుకు ఆసక్తిగా ఎదురుచూస్తున్నాను” అని జహీర్ పేర్కొన్నారు.